2019 оны хавар, зуны улиралд юу таныг хамгийн загварлаг харагдуулах вэ?

“Мода Монголоор дуусдаг” гэдэг үг хэдийнээ ард хоцорчээ. Дэлхий даяарчлагдаж буй энэ цаг үед хэн бүхэн цаг үетэйгээ хөл нийлүүлэн алхах боломжтой болсон. Тиймээс ирж буй зуны улиралд шүүгээгээ ямар хувцсаар дүүргэх тухайгаа бодон суугаа хэн бүхэнд энэ жилийн хавар, зуны хувцас загварын чиг хандлага аль зүгт чиглэж буй тухай мэдээллийг хүргэе.

2019 оны хавар, зун эргэн трэнд болох загварууд

 Эмэгтэйчүүдийн хувьд энэ жилийн хавар болон зуны улирал бүхэлдээ хэлбэр дүрсэд захирагдалгүй, чөлөөт хэв маягийг эрхэмлэсэн жил болох нь ээ. Мэдээж хувцас загварын ертөнцөд байдаг хуучны хэв маяг эргэн ноёлох үзэгдэл энэ жил ч мөн ажиглагдаж байна. Харин тэд хэрхэн зүсээ хувилгасан бол?

-Энэ жил богино суудалтай жийнсэн өмд эргэн трэнд болох магадлал өндөртэй байгаа бөгөөд өнгөрсөн жил хит болоод байсан дөрвөлжин судал энэ жил ч мөн байр сууриа хадгалах нь ээ. Дөрвөлжин хээтэй хувцсаар та хөлийн улнаас эхлэн толгойн орой хүртэл дагнан хувцаслах боломжтой болсон бөгөөд энэ нь санаа зовоод байх зүйл огтхон ч биш болжээ.

-Барын эрээн судал эргэн ирлээ! Энэ жилийн хавар зуны онцлох загварын дунд бидний нэрлэж заншсанаар барын эрээн өнгө орсон байх аж. Мөн матар болон могойн арьсыг санагдуулам хээ энэ жил хүч түрэн орж ирж байгаа бөгөөд энэ нь охид эмэгтэйчүүдийн дотор байдаг амьтанлаг шинж чанарыг сэрээх гэнэ. Ингэснээр бүсгүйчүүд илүү өөртөө итгэлтэй, эрч хүчтэй, загварлаг харагдах аж.

-Ойрын хэдэн жил бүсгүйчүүдийн шүүгээнд өнгө зүсээ солин заларсаар байгаа жампсүйт буюу нэг төрлийн комбинзон энэ жил яг л ажилчны хувцсыг санагдуулам байх ажээ. Өргөн бүсээр чимэглэсэн олон халаас , товч бүхий энэхүү загварыг та өндөр өсгийттэй хослуулан хаана ч хэзээд ч өмсөх боломжтой.

-Олон жилийн өмнө ёстой л хуйлруулж байсан нэг загвар мөн эргэн ирсэн байна. 2000 оны дунд үед эрэгтэй эмэгтэй гэлтгүй олон халаас бүхий шулуун загварын өмд өмсдөг байсныг та сайн санаж байгаа байх. Энэ жил та хуучин дурсамжаа эргэн сэргээн, биед илүү эвтэйхэн Карго загварын өмдыг пүүз болон өндөр өсгийт дээрээ хослуулан өмсөж болох нь ээ.

-Хувин хэлбэртэй малгай. Бид бүхэн горшоокон малгай гэж нэрлэх нь бий. 2000 оны үед мөн л трэнд болж байсан тус малгайг энэ жил нарнаас хамгаалах зорилгоор болон чөлөөт цагаараа, мөн гоёлд ч өмсөж болох нь ээ. Учир нь маш олон төрлийн материалын сонголттой, хээ, чимэглэл бүхий загвар худалдаанд гарч эхэлсэн байна.

-Өнгөрсөн хоёр жилийн турш трэнд болоод байсан мөр гарсан загвартай хувцаснууд энэ жил хуучрах нь ээ. Харин эсэргээрээ илүү том, хөвсгөр мөр моданд орох бөгөөд энэ нь яг л 1980-аад оныг санагдуулам байх ажээ.

-Энэ жил спорт загварын богино шортноос бүү татгалзаарай. Яг л дугуйчны шортыг санагдуулам энэ загварыг юутай ч хослуулж болох гэнэ.

-Харин цүнхний хувьд жижигхэн байх тусмаа сайн. Мөн богц хэлбэрийн цүнхнүүд трэнд хэвээр байсаар байх аж.

-Гуталны хувьд 2000 оны дунд үед байсан гуталнууд эргэн ирж байна. Харахад нүсэр мэт харагдах пүүз болон шөвгөр хоншоор бүхий хэт өндөр биш өсгийтүүд загварын салбарт ноёлох гэнэ. Өсгийний хувьд олон төрлийн хэлбэр бүхий загварууд гарч ирсээр байгаа бөгөөд дөрвөлжин хоншоор ч мөн эргэн трэнд болох төлөвтэй байна.

Харин эрчүүдийн хувьд энэ жил хэд хэдэн трэнд зонхилох бөгөөд элэганс чиглэлийн хувцаслалт эргэн трэнд болж байна. Дэгжин загвартай, чанартай хослол таныг хүчирхэг нэгэн гэсэн сэтгэгдэл төрүүлэх бөгөөд алдартэй брэндүүд ийм төрлийн загварыг чухалчилж эхэлжээ.

-Энэ жил эрэгтэй, эмэгтэй гэлтгүй богино шортоор гангарах нь ээ. Дээр дурдсанчлан дугуйчныг санагдуулам загвартай энэхүү шортыг юун дээр ч өмсөж болох гэнэ.

-Та хослол өмсмөөр байвч эрх чөлөөг эрхэмлэгч гэдгээ мөн тунхагламаар байвал дотуур нь футболк, срочкон цамц өмсөхгүй байж болно. Энэ нь таныг тун ч загварлаг харагдуулах ажээ.

-Хэрэв та хослолоос  илүү срочкан цамцанд дуртай бол түүнийгээ санамсаргүйгээр өмссөн мэт харагдуулахад болох аж. Цамцныхаа нэг талыг өмдөндөө хийж, нөгөө талыг нь сул тавих, энгэрээ задгай орхих, ханцуйгаа хойш нь шуух зэрэгээр энэ төрхийг бүрдүүлэх боломжтой.

- Эрчүүдийн дунд энэ жил өргөн бүстэй урт загварын пиджак, кимоно маягийн өмсгөл мөн трэнд болох нь ээ. Өнгөрсөн жилийн хувьд бүсгүйчүүдийн дунд ихээр дэлгэрсэн энэ төрлийн загвар энэ жил эрчүүдийн сонголт байх нь ээ.

-Загварын салбарт тэргүүлэгч брэндүүд энэ жил принттэй материал ихээр сонгожээ. Таны хувцсан дээр элдэв төрлийн өнгө болон хээнүүд хоорондоо тулалдах мэт сэтгэгдэл төрүүлэм загварууд зонхилсон байх бөгөөд энэ төрлийн загвараас татгалзах хэрэггүй ажээ.

-Гуталны хувьд эрчүүдийн дунд энэ жилийн зун зөөлөн ултай сандаал ноёлох нь ээ.

-Харин ямар цүнх сонгохоо мэдэхгүй байвал жижиг хэмжээтэй янз бүрийн загвар хийц бүхий гар цүнх сонгохыг зөвлөж байна. Жижиг байх тусмаа илүү загварлаг трэнди харагдах ажээ.

Энэ жил бүхэлдээ НЕОН өнгөөр солонгорно

Шүүгээндээ дор хаяж хэд хэдэн неон өнгийн хувцас, хэрэглэл авснаар та илүү өөдрөг эрч хүчээр цэнэглэгдэх аж. Эдгээр өнгө орсон оруулга бүхий эд зүйлс ч байж болно. Та анзаарсан бол зурган дээр гэрэлтэж харагддаг материал бүхий хувцас инстаграмм орчинд шуугиан тарьсаар байгаа. Харсан хүний нүдийг хэсэгтээ л өөр дээрээ тогтоон барих энэхүү хувцаслалт танд таалагдана гэдэгт итгэлтэй байна.

-Эрчүүдийн хувьд саарал ногоон өнгө зонхилох бөгөөд эдгээртэй, шаргал, болон хүрэн өнгөнүүд гайхалтай зохицох болно.

-Мөн хэзээд өөрийн байр суурийг хадгалсаар ирсэн цагаан болон бэйж өнгө трэнд хэвээр байх нь ээ. Эдгээр өнгөнүүдээр дагнан хувцасласан хувцаслалт таныг тансаг бөгөөд дэгжин, эрхэмсэг харагдуулна. Цагаан өнгийн майк, жийнс, кэт энэ жил мөн моданд байсаар байгаа бөгөөд юун дээр ч өмсөж болох эдгээр загварууд минималист хэв маягийг эрхэмлэгчдэд илүүтэй таалагдах нь гарцаагүй.