"Хэсгийн байцаагч" хөтөлбөр хэрэгжиж байна

Цагдаагийн байгууллагын хэсгийн байцаагчийн иргэд, олон нийтэд хүргэх үйлчилгээг чанартай, хүртээмжтэй болгохын тулд Цагдаагийн ерөнхий газраас энэ оны 01 дүгээр сарын 01-ний өдрөөс “Хэсгийн байцаагч” хөтөлбөрийг хэрэгжүүлж эхэлсэн.

Энэ ажлын хүрээнд Цагдаагийн ерөнхий газрын Нийтийн хэв журам хамгаалах, олон нийтийн аюулгүй байдлыг хангах алба, Дотоод хэргийн их сургуулийн Цагдаагийн сургуулийн хооронд сургалтын чанар, үр нөлөөг дээшлүүлэх, алба хаагчдыг чадавхжуулах,  харилцан дэмжлэг туслалцаа үзүүлэх санамж бичгийг байгуулсан.

Хөтөлбөр, санамж бичгийн хэрэгжилтийг хангаж, Дотоод хэргийн их сургууль дээр “Цагдаагийн хэсгийн байцаагчийн үйл ажиллагаа: онол, практикийн тулгамдсан асуудал” эрдэм шинжилгээний бага хурлыг зохион /2019.05.03/ байгууллаа.

Улсын хэмжээний цагдаагийн анги, байгууллагаас нийт 50 гаруй илтгэл ирүүлснээс 2 дугаар шатанд шалгарсан 8 илтгэлийг тус сургуулийн “Эрдэм танхим”-д эрдэмтэн, судлаач, алба хаагчдын дунд нээлттэй хэлэлцүүлж, шагнаж урамшуулав.

Хурлыг зохион байгуулсанаар цагдаагийн хэсгийн байцаагчийн үйл  ажиллагаанд тулгамдаж буй асуудлыг шийдвэрлэх арга, хэлбэр, цаашдын чиг хандлагыг тодорхойлж, судалгааны ажлын үр дүнгээр санал, зөвлөмжийг гаргаж үйл ажиллагаандаа ашиглах юм.