О.Гүндэгмаагаас аавдаа зориулсан суварга - "Хүн шувуу"

Өнөөдөр (2019.05.23) Монгол Улсын Гавьяат тамирчин, Хөдөлмөрийн баатар, Олимпийн мөнгөн медальт О.Гүндэгмаагийн төрсөн өдөр. Түүний төрсөн өдөр онцгой болж байна. О.Гүндэгмаа тэмдэглэлт өдрөө аавдаа зориулжээ. Түүний аав, агаарын спортын зууны манлай тамирчин, шүхрийн болон уулын спортын ОУХМ Дагвын Отряд агсны амьдрал, спортын түүхийг мөнхөлсөн “Хүн шувуу” баримтат кино, дурсамж номын нээлт өнөөдөр болно. Энэ номыг Хөдөлмөрийн баатар О.Гүндэгмаа, Х.Цагаанбаатар нар эмхэтгэн, баримтат киног уран бүтээлчидтэй хамтран бүтээжээ.

Амьдралынхаа сүүлийн мөчийг хүртэл шүхрийн спортоор хичээллэсэн Д.Отряд агсны намтар баян. Монголд хамгийн олон буулт буюу 3820 удаа шүхрээр амжилттай газардсан хүн бол тэр. Энэ амжилтыг өдгөө ч шинэчлээгүй байгаа.

21 аймагт шүхрийн спортыг дэлгэрүүлэх, улсын баяр наадмын үеэр сүүлийн 20 жилийн турш шүхрийн үзүүлэх буултуудыг Д.Отряд агсан мөн анх санаачилж, өнөөг хүртэл энэ үзүүлбэр монголчуудын бахархалт өдрөөр наадамчдын хүртээл болсоор байгаа.

Д.Отряд 1987 онд Сутай хайрханы (4130 м) оргилд АН-2 онгоцноос 4900 м-ийн өндрөөс шүхрийн буулт хийсэн нь дэлхийд хоёр дахь, Ази тивд болон Монголын спортын түүхэнд анхдагч амжилт болон мөнхөрчээ. Энэ амжилт ч мөн өнөөг хүртэл эвдэгдээгүй байгаа.

Энэ мэтчилэн Монголд анх агаарын бөмбөлөг, уулын шүхрийн төрлийг хөгжүүлж, дэлхийн шилдэг 10 гаруй шүхрийн үзүүлбэрийг санаачилж асан олон түүх баримтат кино хийгээд дурсамж номонд мөнхөрсөн нь лавтай.

Аавдаа алдар хүндийн энэ индрээс ухаан зарж, хүндлэл үзүүлж буй Хөдөлмөрийн баатар О.Гүндэгмаа танд төрсөн өдрийн мэнд хүргэе. Номын шим, спортын буян дэлгэрэх болтугай.