ДАРХАН-УУЛ: Төвийн бүсийн аялал жуулчлалын форум эхэллээ

Л.Болд | Zindaa.mn
2019 оны 05 сарын 24

“Бууж саатах- Бурхантын хөндий” Төвийн бүсийн аялал жуулчлалын хоёрдугаар форум өнөөдөр /2019.05.24/ Дархан хотноо зохион байгуулагдаж байна. Тус форумыг Дархан-Уул аймгийн Засаг даргын Тамгын газар, Байгаль орчин аялал жуулчлалын газар, Дарханы аялал жуулчлалын нэгдсэн холбоо хамтран зохион байгуулж байгаа юм.

Форумаар аялал жуулчлалын салбарын бодлого, хэрэгжилт, Төвийн бүсийн аялал жуулчлалд- Дархан-Уул аймгийн оролцоо, Төвийн бүсийн зам тээврийн салбарын өнөөгийн байдлын талаар холбогдох албаныхан танилцуулж Дархан-Уул аймагт аялал жуулчлал хөгжүүлэх гарц, шийдлийг хэлэлцэж байна. Мөн БНСУ-ын Кёнги аймгийн аялал жуулчлалын өнөөгийн байдал, бодлого төлөвлөлт, Альтернатив аялал жуулчлал, Орон нутагт аялал жуулчлалыг амжилттай хөгжүүлсэн хотуудын тэргүүн туршлага, ОХУ-ын мужын аялал жуулчлалын хөгжил,бодлого төлөвлөлт, Аялал жууулчлалын чөлөөт цагийн хувьсал ба байгалийн аялал жуулчлал Монгол Улсад, Тал нутгийн аялал жуулчлалын талаарх тэргүүн туршлагуудтай танилцах юм байна.

Форумын хүрээнд эрдэм шинжилгээний судалгаа, гадаад улс орны хот, орон нутагт аялал жуулчлал хөгжсөн тэргүүн туршлагыг танилцуулах онол, практикийн эрдэм шинжилгээний хурал, мөн Монгол улсын аялал жуулчлалын салбарт ажиллаж буй судлаач багш нарын "Аялал жуулчлалын салбарын үйлчилгээний хүний нөөцийг чадавхжуулах" сургалтуудыг тус тус зохион байгуулж буйгаараа онцлог юм. Төвийн бүсийн аялал жуулчлалын хоёрдугаар форумд төвийн бүсийн таван аймаг, нийслэл хотын аялал жуулчлалын манлайлагч компаниуд, гадаад дотоодын аялал жуулчлалын салбарын эрдэмтэн судлаач, их дээд сургуулиуд, аялал жуулчлалын салбарт хөрөнгө оруулагч бизнес эрхлэгчид, аялал жуулчлалын мэргэжлийн холбоод, нутгийн иргэд оролцож байна. 

 

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top