"Одоо л би хүүгийнхээ төлөө дугарах эрхтэй болж байна"

Одоогоос яг нэг жилийн өмнө найзуудтайгаа гадаа тоглож байсан хүү эмийн сангийн төмөр хаалганд хүрснээр тогонд цохиулж, амь насаа алдсан харамсалтай хэрэг гарч байлаа. Сүхбаатар дүүргийн VII хороонд байрлах “Дэлгэр” төвийн доод давхрын “Эко Шинэс” эмийн сангийн гадна энэ эмгэнэлтэй хэрэг гарсан бөгөөд хүү гүйж явахдаа хөл алдан төмөр хаалганаас барьсны улмаас хүчдэлд цохиулсан юм. Тухайн үед түргэн тусламжийн машин хугацаа алдалгүй ирсэн боловч хүү хэдийнэ хорвоог орхисон байв. 2018 оны зургаадугаар сарын 25-нд болсон энэ хэргийн эзэн холбогдогч нь одоог хүртэл хариуцлага хүлээгээгүй байна.

Энэ талаар талийгаач хүүгийн аав Б.Бямбадорж "Өглөөний сонин"-д дэлгэрэнгүй ярилцлага өглөө. Тэрбээр эхнэр Ж.Мөнхсайханы хамт ирсэн юм. 

-Хүү тань амиа алдсанаас хойш яг жилийн хугацаа өнгөрлөө. Хэрэг хэрхэн шийдэгдсэн бол. Хэн хариуцлага хүлээв?

-Бид жилийн өмнөх энэ өдөр хэнз хүүгээ алдаж, том гарз амссан. Энэ хэрэг өнөөдрийг хүртэл нэг жилийн хугацаанд шийдэгдээгүй л явж байна. Өнгөрсөн нэг жилд манай гэр бүл маш их сэтгэл санааны хохирол, санхүүгийн хямрал, бие бялдрын хохирол амссан. Хэргийн эзэн холбогдогч нь зугтаад алга болсон бол хэргийг хаагаад чимээгүй өнгөрөх байсан байх. Гэтэл тийм зүйл байхгүй. Бүх зүйл нь ил, буруутай эзэн нь тодорхой хэрэг. Жилийн хугацаанд энэ хэрэг шийдэгдээгүй байгаа нь төр засаг, шүүх цагдаа, хүн чанар байхгүй болсон нь харагдаж байна.

-Яагаад ингэж удаж байна гэж та бүгд бодож байгаа вэ?

-Өнгөрсөн нэгдүгээр сарын 17-нд анхны Шүүх хурлын тов гарсан. Энэ шүүх хуралд очиход тус эмийн сангийн эрхлэгч гэх Г.Ганпүрэв гэж хүн ирсэн. Тэр хүн "Би буруугүй, намайг цагаатгаж өгөөч" гэсэн хүсэлт тухайн үедээ гаргасан. “Анхан шатны мөрдөн байцаалт аваагүй. Прокурорын шатанд хэрэгт холбогдогчоор татсан. Энэ нь буруу” гэж тэр хүн хүсэлт тавьсан учраас тухайн үед зарлагдсан шүүх хурал хойшлогдсон. Хэргийн анхан шатны шүүх хурал хойшлогдсоноос хойш өнөөдрийг хүртэл чимээгүй явсаар энэ сарын 16-нд прокуророос бидэнтэй холбоо барьсан. Ганпүрэв гэж хүний хүсэлтээр хэлэлцүүлэг хурал хийе гэсний дагуу шүүх хурлын өмнөх хэлэлцүүлэг зарласан. Зарласан өдөр нь хэлэлцүүлэг хуралд оролцох гээд очтол Ганпүрэвийн өмгөөлөгч ирээгүй, хоёрт хурлын танхим байхгүй, гуравт ажлын цаг дууссан учир хойшлуулъя гэсэн санал гаргаж, хойшлуулсан. Ингээд зургаадугаар сарын 21-ний өдөр хэлэлцүүлэг хийсэн. Хэлэлцүүлэг хуралд оролцтол Г.Ганпүрэв гэх залуу хэргийг дахин задалъя гэсэн хүсэлт гаргасан. Харин шүүх, прокуророос энэ хэргийн мөрдөн байцаалт дууссан гээд шүүх хурлын товыг зарласан. Ингээд зургаадугаар сарын 28-ны 09.00 цагт шүүх хурал болохоор болсон.

-Г.Ганпүрэв гэдэг нь “Эко Шинэс” эмийн сангийн захирал уу?

-Тийм ээ. Тухайн эмийн сангийн эрхлэгч гэсэн. Тэр хүний хувьд түрээсэлж буй байрныхаа эзэнтэй хамтран хохирол барагдуулах саналтай байгаа юм шиг санагдсан. Түрээслэгч байрны эзэнтэй гэрээ контрактын асуудал байгаа гэж сонссон. Тэр талаар бид сайн мэдэхгүй. Өөрийнх нь ярьснаар “Анхан шатны мөрдөн байцаалтад дуудаагүй учир энэ хэргийг хүлээхгүй. Энэ хэрэг надад ямар ч хамаа байхгүй. Байр түрээсэлсэн эзний буруу” гэсэн үндэслэл гаргаж ирээд байгаа юм билээ. Г.Ганпүрэв гэж хүн хуулийн дагуу шүүх хурлаас өмнө хурлын хэлэлцүүлэг хийх хүсэлт гаргасан. Энэ нь гомдол гаргасан хүний хэргийг удаашруулах арга гэж ойлгогдож байгаа. Ингэж явсаар хугацаа өнгөрөх тусам нотлох баримтууд элэгдэж бүдгэрсээр байна. Мөн дээрх үндэслэлээр хэргийг дахин шалгах хэрэгтэй юм байна гэж хэргийг нэг удаа буцаасан. Буяны ажлын нэхэмжлэл жил гаруй болсон учраас элэгдээд мэдэгдэхгүй болчихсон байгаа. Тэр залуу буяны ажлын мөнгөнөөс хассан.

Бид хоёр хүүдээ амттан авч ид гэж мөнгө өгөхөөр түүнийгээ үрэхгүй хадгалдаг байсан юм билээ. Хүүгээ өнгөрсний дараа тэр сейфийг онгойлгож үзтэл дөрвөн жил цуглуулсан мөнгө нь 860 гаруй мянган төгрөг болсон байсан...

-Хүүгээ алдсан та бүхний хувьд нэг жил гэдэг маш урт хугацаа шүү дээ?

-Үнэндээ хэцүү байна. Би архи уудаггүй хүн. Хүүгээ өнгөрснөөс хойш байнга нойргүй байх болсон. Унтахаас өмнө шөнийн 00.00 цагаас 04.00 цаг хүртэл гадуур гарч, алхаж, орж гарсаар шөнийг бардаг. Би нэг компанид ажилладаг байсан. Хүүгээ өнгөрснөөс хойш ажлаа ч хийж чадахаа больсон. Хагас жил ажил хийж чадаагүй. Олны дунд орчих юм бол сэтгэл санаа гайгүй болчих болов уу гэж бодоод компанийнхаа ажилчдыг дагаад Дорноговь аймгийн Халх гол суманд очиж, гурван сар гаруй ажилласан. Тэгсэн хэдий ч хэцүү хэвээрээ байсан. Би ганцаараа тийм хэцүү байсангүй. Миний хүүгийн ээж, ах, эгч нарт бүгдэд нь хэцүү байна. Миний хүү байх тэр үед гэр минь дуу хөөртэй, баяр баясгалан дүүрэн, жинхэнэ аз жаргал цалгидаг байсан юм. Би үнэндээ жил гаруйн хугацаанд хүүхдийнхээ төлөө дуугарч чадаагүй. Намайг халх голоос ирэхэд шүүх хурал нь дөнгөж болсон. Тэр үед шүүх хурал дээр би үг хэлэх эрхгүй зогсож байсан. Би эцэг хүний хувьд хүүгийнхээ төлөө ядаж ганц ч үг хэлж болохгүй юу гэж их гуйсан даа /Уйлав/. Их гуйсан боловч нэг ч үг хэлж чадаагүй. Харин анхан шатны  шүүх хойшлогдсоны дараа би хохирогчоор орох хүсэлт өгсний эцэст одоо л би хүүгийнхээ төлөө дугарах эрхтэй болж байна.

-Та тухайн үед хөдөө ажиллаж байсан юм уу?

-Тийм ээ. Үнэнийг хэлэхэд өнөөдрийг хүртэл бидэнд маш хэцүү байна. Гэрээс гараад нэг алхахад л үе тэнгийн нөхөд, хүүхдүүд нь тааралдана. Тэр үед гүйж очоод тэвэрмээр, үнсмээр, үнэрлэмээр байдаг. Гадаа хүүхэд уйлахад, миний хүү байхгүй шүү дээ гэж бодсон атлаа өөрийн эрхгүй гүйгээд гардаг. Энэ зовлонг би ганцаараа туулаагүй ээ. Миний гэр бүл тэр чигтээ шаналал дунд байна. Дүү нь нэгдүгээр ангийн охин. Одоо гадаа тоглохоо больсон. Гарахаар хүүхдүүд ахыг нь асуудаг гэсэн. Тэгээд бараг гадаа гарч тоглохоо больсон.

Миний хүү гайхалтай цовоо хүү байсан

Дандаа гэнэн мөрөөддөг хүүхэд байсан сан. Боксчин болно, нисгэгч болно гэдэг байсан. Би хүүдээ таван насных нь төрсөн өдрөөр жижигхэн сейф авч өгч байсан юм. Миний хүү түрүүвчиндээ түнтийтэл мөнгө хураагаад л байдаг байсан. Таван настайгаасаа тэр сейфэнд мөнгөө хурааж эхэлсэн юм. Бид хоёр хүүдээ амттан авч ид гэж мөнгө өгөхөөр түүнийгээ үрэхгүй хадгалдаг байсан юм билээ. Хүүгээ өнгөрсний дараа сейфийг нь онгойлгож үзтэл дөрвөн жил цуглуулсан мөнгө нь 860 гаруй мянган төгрөг болсон байсан /Уйлав/. Тэр их мөнгийг цуглуулна гэж бодоогүй ээ. Тэр чинь ердөө жаахан амьтан шүү дээ. Гэр бүлдээ энэ талаар хэлсэн. Тэр мөнгөнд бид гар хүрээгүй ээ. Харин хүн бүр тэнд мөнгө нэмж хийдэг болсон. Одоо миний хүүгийн мөнгө таван сая гаруй төгрөг болж байгаа. Би өдрийн хоолныхоо мөнгөнөөс хасаад хүртэл тийшээ нэмдэг болсон. Хүүгийнхээ төлөө хийж байгаа зүйл шиг санагддаг болчихдог юм билээ. 

-Мөрдөн байцаагч олон удаа солигдсон гэж ярилаа. Одоо ч солигдсон хэвээрээ юу?

-Хэрэг анх Батсайхан гэж байцаагч дээр байсан. Сарын дараа Гарьд гэж байцаагч дээр очсон. Прокурорын шатанд явж байхад нь Мөнхгэрэл гэж эмэгтэй хариуцаж байсан. Өнгөрсөн нэгдүгээр сард анхан шатны шүүх хурал хойшлоод, ахин анхан шатнаасаа эхэлсэн. Хэрэг прокурорт дахин буцахад мөн л байцаагч нь солигдсон. Тэрний дараа шүүгч нь мөн солигдсон. Ингээд л ахиад хэргийг шинээр шалгах болдог. Энэ мэт цаг хугацаа шаардсан зүйлс их саад болж байна. Энэ хугацаанд солигдсон байцаагчдаас ганц нэг нь тушаал дэвшсэн, зарим нэг нь хөдөө томилолт авсан, амралтаа авсан гэх шалтгаанаар хэргийг шилжүүлж ирсэн. Батсайхан байцаагч солигдсоноос долоо хоногийн дараа “Эко Шинэс” аптек нүүсэн байсан. Мөрдөн байцаалт дуусаагүй байтал энэ аптек ингээд нүүж болох байсан уу. Тухайн үед ажиллаж байсан эм зүйч охин тогонд цохиулсан байдаг юм билээ. Би хүртэл хүүгээ ухаан алдсаны дараа тэр хаалганд гар хүрэхэд тогонд цохиулсан шүү дээ. Тэр үеийн зургаадугаар сарын 22-нд бороо орсноос хойш том, жижиг гэлтгүй хүмүүс тогонд цохиулах тохиолдол гарч байсан юм билээ. Ингэж явсаар 25-ны өдөр миний хүүгийн аминд хүрсэн байгаа юм. Энэ хугацаанд Ганпүрэв гэж хүн хаалганд асуудал үүсээд байгааг мэдээгүй гэж мэдүүлэг өгсөн байдаг. 

-Одоо та бүхэн ямар бодолтой байна вэ?

-Би үнэндээ тэр хүмүүст гэхээсээ илүү чин сэтгэлээсээ төр засагтаа гомдож явдаг. Тэр тусмаа Барилга хот, байгуулалтын яам байна. Тэр яаманд ажлын хариуцлага байхгүй байна. Дээд, доод, дунд аль ч шатандаа ажлын хариуцлага байхгүй байна. Энэ байгууллага дүүрэгтээ, дүүрэг нь хороондоо шаардлага тавьдаг байсан бол тэр хаалганд өчнөөн удаан тог байхад мэдэхгүй байна гэж байхгүй шүү дээ. Энэ миний л бодол. Би тэр байгууллагад хүсэлт гаргасан. Танай байгууллагыг буруутай гэж бодож байна. Та нар хариуцлагагүйн улмаас нэг хүүгийн хүсэл мөрөөдөл үгүй боллоо гэсэн хүсэлт гаргасан боловч “Бид эзэн холбогдогчийг нь олж өгөхөд тусалъя” гэсэн хариу ирсэн. Алдсан хүн арван тамтай гэж. Хүүгээ алдсан хүн хүнийг буруу зөрүү боддог л байх. Аль болох хүнийг буруутгахгүй юм сан гэж бодож явсан.

-Өмгөөлөгчтэйгөө байнга холбоотой байгаа юу?

-Анх бид нэг өмгөөлөгчтэй байсан. Сүүлдээ бүр болохгүй болохоор нь унаж явсан машинаа зараад, дахин нэг өмгөөлөгч авсан. Монголын шүүх бидэнд тохиолдсон энэ асуудлыг үнэн зөвөөр шийдэж, хариуцлага ярих байх гэж итгэж байгаа. Тиймдээ ч би жил гаруй хугацаанд чимээгүй суулаа. Би залуудаа ижийгээ алдаж байсан. Ахыгаа бас алдаж байсан. Тэгэхэд би жилийн турш ингэж шаналж байгаагүй. Хүлээн зөвшөөрч чадаж байсан. Хорвоогийн жам юм даа гэж бодсон. Гэтэл бяцхан үрээ алдсандаа итгэж чадахгүй байна, одоог хүртэл. Миний хүүхэд хань бид хоёрыг нас ахисан хойно төрсөн амины үр минь байсан. Хүн чимээгүй дотроо шаналж явсан ч гэсэн цаанаасаа бие нь болж өгдөггүй гэдгийг харлаа. Харин дотроо зовж, уйлж шаналж байхаар сэтгэлийн зовлонгоо ил гаргасан нь илүү дээр юм байна гэдгийг ойлгосон.

-Талийгаач хүүгийн тань хэрэг үнэн зөв шийдэгдээсэй гэж хүсэж байна?

-Миний хүүгээс хойш дөрвөн хүүхэд, нэг том хүн тогонд цохиулж нас барсан шүү дээ. Үнэхээр тэр байгууллага хариуцлагатай байсан бол ийм олон хүн тийм золгүй байдлаар өнгөрөхгүй байсан. Түүнийг хүн бүр мэдэж байгаа. Миний хүүг бурхан болсны дараагаар манай тэр хавийн ил задгай цахилгааны утсыг бүгдийг янзалсан. Ажлаа мэдээд хийх юм бол ажлын үүрэг хариуцлага, чанартай сайн хийдэг юм байна гэдгийг бид харсан. Тэр цагаас хойш миний хүүгийн амь эрсэдсэн энэ газар дахин хүний амь бүү үргэдээсэй гэж бодож явдаг болсон. 

Эх сурвалж: ӨГЛӨӨНИЙ СОНИН