Б.Дашдондог: “The Hu” хамтлагийн төлөө ЕСӨН ЖИЛ зарцуулсан

Дэлхийн хөгжмийн урлаг дахь рок урсгал зогсонги байдалд ороод байсныг бут цохисон хамтлаг бол “The Hu”. “Хүннү рок” хэмээх шинэ урсгалаар уран бүтээлээ туурвидаг тэдний уран бүтээлийг өнөөдөр олон улс өндрөөр үнэлж, дүгнэж байна.

Тэгвэл Монголдоо төдийгүй олон улсад нэрээ цуурайтуулж яваа “The Hu” хамтлаг өчигдөр /2019.07.08/ нийслэлийн дээд шагнал “Хангарди” одон хүртлээ.

Монгол Улсын Гавьяат жүжигчин, дуучин, продюсер Б.Дашдондогийн 2016 онд үүсгэн байгуулж, 2018 онд албан ёсоор “Yu ve Yu ve Yu” нэртэй анхны уран бүтээлээ цацаж байсан “The Hu” хамтлаг Европын 13 орноор аялан тоглолтоо хийн, эх орондоо ирээд удаагүй байгаа юм.

Тус хамтлагийн продюсер Б.Дашдондог “Хүннү рок” хэмээх шинэ урсгалаар тоглодог анхны рок хамтлаг үүсгэн байгуулах санааг 2012 оноос эхлэн хэрэгжүүлж, хамтлагийн гишүүдийг бүрдүүлэх, уран бүтээлийн урсгал, чиглэлийг тодорхойлох, стиль имижийг бүрдүүлэх ажлыг хийж эхэлжээ. Тэд яг одоогоор анхны бие даасан уран бүтээлийн цомог дээрээ ажиллаж байна. Хамтлагийн анхны цомог “Гэрэг” нэртэй.

“The Hu” хамтлагийн аялан тоглолтын талаар болон шагнал хүртсэн сэтгэгдлийг продюсер Б.Дашдондогоос тодрууллаа.

-Нэр хүндтэй шагнал хүртсэн “The Hu” хамтлагийнханд баяр хүргэе. Монголын урлагт нэгэн шинэ өнгө нэмсэн “The Hu” хамтлаг олон улсад эх орныхоо нэрийг гаргаж явна. Үндэсний их баяр наадмын босгон дээр нийслэлээс “Хангарди” дээд шагналыг хүртлээ. Сэтгэгдлээсээ хуваалцаач?

-Мэдээж бид маш их баяртай байна. “Хангарди” шагнал бол нэр хүндтэй шагналуудын нэг. Энэ шагналыг маш их зүйлийг хийж бүтээсэн хүмүүст олгодог гэж би ойлгодог. Бидний хувьд ийм шагнал авна гэж зүүдлээ ч үгүй явлаа. Өнөөдөр бидэнд энэ шагналыг хүртээж байгаа нь цаашид “The Hu” хамтлаг буюу “Хүннү” рок урсгал дэлхийд улам хүч аваарай гэсэн итгэл, том хариуцлага гэж бодож байна.

-“The Hu” хамтлагийг үүсгэн байгуулах, “Хүннү” рок урсгалыг гаргаж ирэх болсон таны гол санаа, сэдэл юу байсан юм бэ?

-Аавынхаа нутагт очсон байхад надад төрсөн санаа юм. Би аавдаа, өвөг дээдэстээ зориулж нэг сайхан дуу хийх юм сан гэж их бодож явсан. Тэр дууг яаж хийх вэ гэж бараг жил шахуу эргэцүүлсэн. Миний аавын төрсөн нутаг Ховд аймгийн Чандмань сум. Хөөмий, хархирааны эх нутаг. Маш эрчтэй, хийморьлог дуу хийх сэдлийг эндээс л олсон доо. Улмаар “The Hu” хамтлаг бий болсон.

-Та “Хүннү” рок урсгалын талаар удаан хугацаанд судалгаа хийсэн гэж байсан?

-“The Hu” хамтлагийг үүсгэн байгуулахын тулд есөн жилийн хугацаа зарцуулжээ. Энэ хугацаанд 4-5 жилийг судалгааны ажилд зарцуулсан. “Хүннү” рок урсгал бидний өвөг дээдсийн үед л зохиогдчихсон байж ээ. Ийм үндэслэлийг л  “The Hu” дэвшүүлж, уран бүтээлээ туурвидаг.

-Европын орнуудаар аялан тоглолтоо хийж байхад ямар улс хамгийн халуун дотноор хүлээж авсан бэ?

-Тэр улс гэж ялгах зүйлгүй. Бүгд л маш дотно хүлээж авсан. 

-Дэлхийн 13 улсын хөгжмийн наадамд оролцож, уран бүтээлээ олон мянган сонсогчдод хүргэлээ. Гаднынхан “The Hu” хамтлагийг хэрхэн дүгнэв?

-Өнөөдөр дэлхийд рок хөгжим дээд цэгтээ тултлаа хөгжчихсөн. Тэр хөгжил нь нэг л хэвийн шинжтэй болоод их удсан гэж мэргэжилтнүүд дүгнэсэн. Ийм ойлголттой байсан хүмүүст “The Hu” хамтлаг цоо шинэ хуудсыг нээж өглөө гэж дүгнэсэн нь бидний хувьд хамгийн үнэ цэнтэй байлаа.

-Одоо гаднын хэчнээн фестивальд оролцох урилга хүлээж аваад байгаа вэ?

-Есдүгээр сараас АНУ болон Латин Америкийн орнуудаар аялан тоглолттой. Одоогийн байдлаар 20 гаран тоглолтод оролцохоор болсон байна. Анх яригдаж байснаар бол бараг 40-өөд тоглолт байсан. Бидний төлөвлөгөөгөөр арван хоёрдугаар сарын эхэн хүртэл аялан тоглолт үргэлжилнэ. Мөн есдүгээр сарын дундуур цомгийнхоо нээлтийг хийх төлөвлөгөөтэй байна.

-Үндэсний их баяр наадмаар ямар нэгэн үйл ажиллагаа төлөвлөсөн үү?

-Хамтлаг маань бүтэн сарын турш аялан тоглолттой байлаа. Бид Үндэсний их баяр наадмаар ямар нэгэн үйл ажиллагаанд оролцох төлөвлөгөө алга. “The Hu”-д одоо хамгийн их хэрэгтэй байгаа зүйл бол амралт. Бидэнд дахиад олон сарын аялан тоглолт байгаа учраас.