"Эмээлт"-ийн ЭМГЭНЭЛ

-Нийслэлчүүд "Эмээлт"-д үйл ажиллагаа явуулдаг стандартын бус, ариун цэврийн наад захын шаардлага хангахгүй мял нядалгааны газарт "муулсан" малын махыг хүнсэндээ хэрэглэж иржээ-

Монголчуудын гол хүнсний хэрэглээ бол мах. Харамсалтай нь, махны үнэ "тэнгэрт хад"-аад удаж байна. Үнэ нь "тэнгэрт хадсан" шалтгаан нь маш энгийн. Ердөө л "Эмээлт" захтай салшгүй холбоотой гэхэд болно. Өөрөөр хэлбэл, "Эмээлт" захад мах, махан бүтээгдэхүүн зарж байгаа ченжүүд малчдаас малыг нь хямд үнээр худалдан авч, түүнийгээ хэд дахин өндөр үнээр зардаг. Үүнийг хүн бүр мэдэх ч тэд наад захын ариун цэврийн болон стандартын шаардлага хангахгүй газарт малыг нядлуулж, түүгээрээ нийслэлчүүдийн махны хэрэглээний ихэнх хувийг хангаж байдгийг төдийлөн сайн мэддэггүй.

Стандартын бус, ариун цэврийн шаардлага хангахгүй орчинд таван хошуу малыг нядалж, тэрхүү махаараа нийслэлчүүдийг хангадаг газар “Эмээлт” захад хэд, хэд бий. Гаднах орчноос нь эхлүүлээд нядалгаа хийдэг газар нь бохир төдийгүй үнэр, танар нь гэж авах юмгүй байдаг юм билээ. Тэд ийм орчиндоо бог малыг 3500-4000 төгрөгөөр нядалдаг. Харин бод малыг 18-20 мянган төгрөгөөр нядална. Бас нэг анхаарал татсан зүйл нь ажилчдад нь цагийн хуваарь гэж бараг л байдаггүй нь анзаарагдсан. Захиалга, ажлын нөхцөлөөсөө шалтгаалж өдөрт хэд л бол хэдэн малыг нядалдаг тул ажилчид нь амьжиргаагаа залгуулахын тулд ажил олгогчдынхоо хүслээр ажилладаг гэхэд болно.

Хамгийн сонирхолтой нь, стандартын шаардлага хангахгүй газарт үйл ажиллагаа явуулах зөвшөөрлийг хаанаас хэн гэгч олгодог нь сонин. Тэдэнд ямар газар хяналт тавьдаг нь ч хачирхалтай санагдана. Гэтэл бохир, заваан орчинд нядалсан, малын гарал үүслийн болон шинжилгээний бичиггүй  малын махыг ихэвчлэн хотын хаа сайгүй үйл ажиллагаа явуулдаг ресторан, цайны газарт болон томоохон захын махны лангуунд нийлүүлдэг талаар албан бус эх сурвалж мэдээлж байна. Өөрөөр хэлбэл, нийслэлчүүд "Эмээлт"-д үйл ажиллагаа явуулдаг стандартын бус, ариун цэврийн наад захын шаардлага хангахгүй мял нядалгааны газарт "муулсан", шинжилгээний бичиггүй малын махыг хүнсэндээ хэрэглэж иржээ.

Энэ нь шууд утгаараа Монгол Улсын нийт хүн амын талаас илүү хувь нь амьдардаг нийслэлчүүдийн хүнсний аюулгүй байдалд “заналхийлсэн” явдал юм. Гэтэл тэдэнд хяналт тавьж ажиллах ёстой Нийслэлийн мэргэжлийн хяналтын газрынхан өнөөг хэр нь ямар нэгэн арга хэмжээ аваагүй. Өөрөөр хэлбэл, тус газрынхан ажлаа хийдэггүй гэхэд болно. Үгүй гэвэл тэдэнд стандартын болон ариун цэврийн шаардлага хангахгүй мал нядалгааны газруудын хаалгыг барьж, үйл ажиллагааг нь хэдийн зогсоох хангалттай цаг хугацаа байлаа. Түүгээр ч зогсохгүй иргэд нь хүнсний аюулгүй байдалд “заналхийлсэн”, ариун цэврийн наад захын шаардлага хангахгүй газраас нийлүүлэгдсэн мах, махан бүтээгдэхүүн хэрэглэж байхад Хотын дарга нь мэдээгүй гэхэд итгэмээргүй.

Ямартай ч нийслэлчүүд хүнсэндээ ямар ч шинжилгээний бичиггүй, стандартын болон ариун цэврийн шаардлага хангахгүй газраас нийлүүлсэн махыг хэрэглэж байна. Иргэдийн амь нас, эрүүл мэндийг бодсон ч “Эмээлт” захад үйл ажиллагаа явуулдаг мал нядалгааны газруудын үйл ажиллагааг зогсоох шаардлагатай байна. Махыг “тэнгэрт хадсан” өндөр үнээр худалдан авч хүнсэндээ хэрэглэж байгаа нийслэлчүүд ядаж баталгаатай мах, махан бүтээгдэхүүн хэрэглэмээр байна. Хотын дарга та, ажлаа хийнэ үү. Нийслэлийн мэргэжлийн хяналтын газрын дарга та ч бас ажлаа хийнэ үү. Цаана чинь хүнсний аюулгүй байдалд “заналхийлж” эхлээд олон сар, жил болж байна. Ёстой л "Эмээлт"-ийн эмгэнэл гэдэг чинь л энэ байна шүү.