Монгол- Хятадын соёлын солилцооны долоо хоног амжилттай боллоо

Автор | Zindaa.mn
2019 оны 09 сарын 13

“Монгол- Хятадын” гурав дахь удаагийн арга хэмжээ есдүгээр сарын 05-наас 10-ны  өдрүүдэд  “Хятад- Монгол- Орос гурван улсын эдийн засгийн коридорыг бүтээн байгуулж, Зүүн хойд азийн бүс нутгийн хамтын ажиллагааг урагшлуулья” уриалга дор БНХАУ-ын ӨМӨЗО-ны Хөх хот, Улаанцав /Жинин/, Тунгляо хотуудад боллоо.

Тус экспо нь хөрш орнуудын найрсаг харилцаа, гадаад худалдаа, соёлын болон эдийн засгийн хамтын ажиллагааг өргөжүүлэх, хөрөнгө оруулалтыг нэмэгдүүлэх зорилготойгоор хоёл жил тутамд зохиогддог бөгөөд энэ жил хоёр улсын хооронд дипломат харилцаа тогтоосны 70 жилийн ойн хүрээнд болж буйгаараа онцлог байв.  

ЭКСПО- ийн хүрээнд Монгол- Хятадын олон улсын соёлын солилцооны долоо хоног зохион байгуулагдсан бөгөөд Монгол Улсыг төлөөлөн Засгийн газрын хэрэгжүүлэгч агентлаг Соёл, урлагийн газар хариуцан ажиллаж, 200 гаруй уран бүтээлчид оролцлоо. Соёлын солилцооны долоо хоногийн хүрээнд Улаанцав /Жинин/ хотын спортын ордонд есдүгээр сарын 05-нд экспогийн нээлтэд зориулсан Монгол улс, БНХАУ, ОХУ- ын 800 орчим уран бүтээлчдийн хамтарсан тоглолт зохион байгуулж уг тоглолтыг экспогийн хүндэт зочид болох 1000 гаруй хүн үзсэн юм.

Есдүгээр сарын 06- нд Монгол Улсын дуурь бүжгийн эрдмийн чуулга, Морин хуурын чуулга, ЦДБЭЧ, Түмэн эх чуулга, “Шинэ цирк төв”- ийн уран бүтээлчдийн оролцсон “Монголын сайхан орон” тоглолт зохион болж Улаанцав /Жинин/ хотын 1000 гаруй иргэд олон нийт үзэж сонирхлоо.  

Энэ удаагийн экспогийн соёлын солилцооны долоо хоногийн хүрээнд есдүгээр сарын 06-наас 10-ны өдрүүдэд Хөх хотноо зохион байгуулсан Монгол бүжгийн гурав дахь удаагийн олон улсын уралдаанд ЦДБЭЧ, Түмэн эх чуулгын 40 гаруй бүжигчид оролцож тэргүүн шагналуудын эзэн болов. Уг уралдаанд Монгол улс, БНХАУ-ын ӨМӨЗО, Шинжан уйгар, ОХУ-ын Буриад, Тува, Халимаг зэрэг улс, орнуудын нийт 800 орчим бүжигчдийг хамруулсан өргөн цар хүрээтэй арга хэмжээ болж өнгөрөв.

Мөн Экспогийн соёлын солилцооны долоо хоногийн хөтөлбөрийн хүрээнд багтсан онцлох томоохон арга хэмжээ бол их зохиолч Д.Нацагдоржийн цомнол, Б.Дамдинсүрэнгийн хөгжим “Учиртай гурван толгой” үндэсний сонгодог дуурийг Улсын дуурь бүжгийн эрдмийн чуулгын уран бүтээлчид ӨМӨЗО-ны Хөх хотын Улаан театрт есдүгээр сарын 10, 11- ний өдрүүдэд анх удаа үзэгчдийн хүртээл болгосон үйл явдал байлаа.

 

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top