СЭРЭМЖЛҮҮЛЭГ: Орон нутагт зам тээврийн ослоор гурван иргэн амиа алджээ

Тээврийн цагдаагийн албаны Жижүүрийн шуурхай удирдлагын хэлтэс өнгөрсөн амралтын өдрүүдэд нийт 531 дуудлага мэдээлэл хүлээн авснаас 364 нь зам тээврийн ослын шинжтэй дуудлага мэдээлэл бүртгэгджээ. 

Тухайлбал, энэ сарын 28-ны өдрийн 17.48 цагийн орчимд Сонгинохайрхан дүүргийн 21 дүгээр хороо Партизаны замд "Тоёота Приус" маркийн авто машин онхолдож, зорчигч Н нас барж, зорчигч С гэмтжээ. 

Мөн өчигдөр 17.00 цагий орчимд Баянхонгор аймгийн Баян-Овоо сумын хоёрдугаар багийн нутаг “Самбартай хөтөл” гэх газар /Сумын төвөөс урагш 28 км/-т асфальтан замд авто машин онхолдож, зорчигч А, Б нарын хоёр хүн нас барж, жолооч Н, зорчигч Э нарын гэмтсэн байна.

Түүнчлэн Төв аймгийн Баян сумын Цавчир гуравдугаар багийн нутаг Бамбар хорооны хоёрдугаар гудамжинд авто машины жолооч Ж нь явган зорчигч У-г мөргөж амь насын хохироосон хэрэг гарчээ. Тээврийн цагдаагийн албанаас тээврийн хэрэгслийн жолооч болон явган зорчигчдод замын хөдөлгөөний дүрэмд заасан үүргээ биелүүлж хөдөлгөөнд оролцохыг анхааруулж байна.