Есөн сарын байдлаар 823 хүн гэмт хэргийн золиос болж, амиа алджээ

Цагдаагийн байгууллага 2019 оны эхний есөн сарын байдлаар 449 мянга 299 дуудлага, мэдээлэл хүлээн авч хуульд заасан журмын дагуу шалгаж шийдвэрлэжээ. Энэ нь сард 49 мянга 922, хоногт 1664, цагт 139 дуудлага мэдээлэл цагдаагийн байгууллагад ирсэн гэсэн үг юм.

Энэ хугацаанд улсын хэмжээнд 26 мянга 314 гэмт хэрэг бүртгэгдсэн бөгөөд 17 мянга 564 буюу 66.7 хувь нь Улаанбаатар хотод, 8.692 буюу 33.1 хувь нь орон нутагт бүртгэгджээ.

Гэмт хэргийн гаралтыг өмнөх оны мөн үетэй харьцуулбал нийт гэмт хэрэг 2236 буюу 7.8 хувиар, Улаанбаатар хотод бүртгэгдсэн гэмт хэрэг 2961 буюу 14.4 хувиар тус тус буурсан байна.

Бүртгэгдсэн гэмт хэргийг Эрүүгийн хуулийн бүлгээр авч үзвэл Өмчлөх эрхийн эсрэг гэмт хэрэг /хулгайлах, дээрэмдэх гэх мэт/ 15 мянга 818, Хүний эрүүл мэндийн халдашгүй байдлын эсрэг гэмт хэрэг зургаан мянга 323 бүртгэгдсэн нь өмнөх оны мөн үеийнхээс Өмчлөх эрхийн эсрэг гэмт хэрэг 11.6 хувиар, Хүний эрүүл мэндийн халдашгүй байдлын эсрэг гэмт хэрэг 12.8 хувиар тус тус буурчээ. Дээрх хоёр бүлгийн гэмт хэрэг нь нийт гэмт хэргийн 84.6 хувийг эзэлж байна.

Энэ хугацаанд бүртгэгдсэн гэмт хэргийн 11.9 хувь нь согтуугаар, гурван хувь нь гэр бүлийн хүчирхийллийн улмаас, 2.7 хувь нь хүүхэд оролцож үйлдсэн бол 74.4 хувь нь ажлын өдрүүдэд, 30.2 хувь нь шөнийн цагаар, 31.2 хувь нь гэр орон сууцанд, 19.3 хувь нь гудамж талбайд үйлдэгджээ. Гэмт хэргийн улмаас 1327 хүүхэд хохирсон бол 906 хүүхэд гэмт хэрэгт холбогдсон байна.

Гэмт хэргийн илрүүлэлт улсын хэмжээнд 35.4 байгаа нь өмнөх оны мөн үеийнхээс 6.4 хувиар өсжээ.

Энэ хугацаанд 25 мянга 555 иргэн гэмт хэргийн улмаас хохирсноос 823 хүн нас барж, 6615 хүн гэмтсэн нь өмнөх оны мөн үетэй харьцуулбал, нас барсан хүн 95 буюу 13 хувиар өсөж,  гэмтсэн хүн 141 буюу 2.1 хувиар буурсан байна.

Гэмт хэргийн улмаас иргэн, хуулийн этгээдэд 225,178.1 сая төгрөгийн хохирол учирснаас 32,326.3 сая төгрөг буюу 14.4 хувийг нөхөн төлүүлж, 5,007.8  сая төгрөгийн хөрөнгийг битүүмжилжээ.

Нийт нэг сая 517 мянга 506 зөрчил шалгасан нь өмнөх оны мөн үетэй харьцуулахад 314 мянга 145 буюу 26.1 хувиар, нэг сая 511 мянга зөрчлийг шийдвэрлэсэн нь өмнөх оны мөн үетэй харьцуулахад 316 мянга 826 буюу 26.5 хувиар тус тус өссөн байна.

Нийт зөрчлийн 92.7 хувийг “Замын хөдөлгөөний аюулгүй байдлын хууль тогтоомж зөрчих” зөрчил эзэлжээ.

Мөн энэ хугацаанд 78 мянга 316 хүн эрүүлжүүлэгдсэн нь өмнөх оны мөн үеэс 16 мянга 908 буюу 27.5 хувиар өсөж эрүүлжүүлэгдсэн хүний 56 мянга 92 буюу 71.6 хувь нь Улаанбаатар хотод, 22 мянга 224 буюу 28.4 хувь нь орон нутагт байна.