“Соёл, урлагийн менежмент Монголд” хөтөлбөр амжилттай хэрэгжлээ

Соёл, урлагийн удирдлага, менежмент, залуу манлайлагчдын мэргэжил дээшлүүлэх ахисан түвшний сургалт, солилцооны хөтөлбөр нь Монгол Улсын Боловсрол, соёл, шинжлэх ухаан спортын яам, Соёл, урлагийг дэмжих сангийн дэмжлэгээр Герман улсын Соёл, урлаг, хэвлэл мэдээллийн эдийн засгийн хүрээлэнтэй хамтын ажиллагааны хүрээнд 2019 оны ес, аравдугаар саруудад Улаанбаатар, Берлин хотноо амжилттай зохион байгууллаа.

Соёл, урлагийн салбарын байгууллагын менежмент, удирдлага зүй, хүний нөөцийн ур чадварыг олон улсын мэргэжлийн аргазүйгээр дээшлүүлэх замаар соёл урлагийн дэд бүтэц, түүний тогтвортой хөгжил, хамтын ажиллагааг өргөжүүлэн тэлэх зорилго бүхий энэхүү хөтөлбөрт тайз дэлгэцийн урлаг, галерей, энтертейнмэнт, орон нутгийн соёлын төв, сонсголгүй иргэдийн соёлын төв, соёл урлагийн үйл ажиллагаа явуулдаг төрийн бус байгууллага зэрэг төрийн болон төрийн бус соёл урлагийн олон талт үйл ажиллагаа эрхлэгч 9 байгууллагын удирдлага, менежер, мэргэжилтнүүд хамрагдав.

Хөтөлбөрийн хүрээнд соёл, урлагийн менежмент, удирдлага зүй, стратеги төлөвлөгөө, соёлын бодлого, соёлын өв, хууль эрхзүйн хүрээ, маркетинг, олон улсын харилцаа хамтын ажиллагаа, үзэгч, олон нийтийн хөгжлийн асуудал ба урлагийн боловсрол, соёлын болон бүтээлч үйлдвэрлэл, кластерууд, төсөв, санхүү, сан бүрдүүлэлт, хяналт шинжилгээний талаар эрчимжүүлсэн сургалтууд явагдсан.

Хөтөлбөрийн онолын нэгдүгээр шат есдүгээр сарын 23-29-ны өдрүүдэд, хоёрдугаар шат аравдугаар сарын 9-16-ны өдрүүдэд Хүүхдийн төв номын сангийн Утгын оньс танхимд Улаанбаатар хотноо зохион байгуулж, мэргэжлийн онолын хичээлүүдийг "Соёл урлаг, хэвлэл мэдээллийн эдийн засгийн хүрээлэн“-гийн захирал, Проф.Др.Клаус Зийбенхаар, урлагийн түүхч, соёл урлагийн менежер, ЮНЕСКО-гийн 2005 оны Конвенцийн олон улсын шинжээч Ж.Бодьбаатар, соёл урлаг, хэвлэл мэдээллийн салбарын удирдлага зүйч, менежер О.Оюунтуяа, оюуны өмчийн эрх зүйн зөвлөх Др. Д.Уянга нар удирдав.

Гуравдугаар шат болох солилцооны хөтөлбөрийн хүрээнд аравдугаар сарын 17-24-ны өдрүүдэд оролцогч залуу манлайлагчид маань Герман Улсын Берлин хотын соёл, урлагийн байгууллагуудын менежмент, бүтэц, үйл ажиллагаатай танилцан онолоор сурсан мэдлэгээ практик дээр бататгаж мэргэжлийн know-how судалгааг хийлээ. Нийт 17 төрийн ба төрийн бус соёл урлагийн байгууллагуудын удирдлагууд манай соёл урлагийн байгууллагын төлөөлийг хүлээн авч үйл ажиллагаагаа танилцуулан, хөтөлбөр, маркетинг, үзэгч, олон нийтийн хөгжлийн асуудал, урлагийн боловсрол, соёлын болон бүтээлч үйлдвэрлэл, кластерууд, олон улсын харилцаа хамтын ажиллагаа сэдвүүдээр санал солилцлоо.