Хөлбөмбөгийн спортыг нэг тэрбум төгрөгөөр дэмжлээ

Багийн спортыг дэмжигч Худалдаа, хөгжлийн банк Монголын Хөлбөмбөгийн холбооны үйл ажиллагааг дэмжин ажиллахаар боллоо.

Энэхүү хамтын ажиллагааны хүрээнд Улаанбаатар хотод Олон Улсын Хөлбөмбөгийн Холбоо (FIFA)-ны стандартаар бүтээн байгуулагдаж байгаа хөлбөмбөгийн талбайн орчны тохижилтод 1 тэрбум төгрөгийн ивээн тэтгэлэг, санхүүгийн дэмжлэг үзүүлэн хамтран ажиллах ажээ. 

Худалдаа хөгжлийн банкны Ерѳнхийлѳгч Б.Мэдрээ, МХБХ-ны Ерөнхий нарийн бичгийн дарга Ө.Шижир нар гэрээнд гарын үсэг зурлаа.

Түүнчлэн Яармагт баригдах олон улсын стандартыг хангасан хөлбөмбөгийн цэнгэлдэхийг ХХБанкны нэрэмжит болгон зарлалаа. Гэрээнд заасны дагуу 1 тэрбум төгрөгийн 70 хүртэлх хувийг "TDB" цэнгэлдэх хүрээлэнгийн тохижилтод зарцуулна. Энэхүү талбай нь манай улсад баригдсан хамгийн том хэмжээтэй буюу 73 харьцах 115 метр гэдгээрээ онцлогтой.
 

Монгол Улсын Үндэсний шигшээ багийн хувьд амжилт нь жил ирэх тусам өсөж байна. Өнөөдрийн байдлаар Дэлхийн Аварга Шалгаруулах тэмцээний урьдчилсан шатны 2 дахь сунгаанд анх удаа шалгарч, анхны гоол цаашлаад анхны хожлоо авсан нь үүнийг бэлхэн харуулж хөлбөмбөг сонирхогчдыг баярлуулсан. Үндэсний шигшээ баг Мьянмар улсын эсрэг арваннэгдүгээр сарын 19-ний өдөр энэ шатны ээлжит тоглолтоо хийнэ. Энэ тоглолтын бэлтгэл болгож тэд тун удахгүй Камбож улсыг зорих гэж байна.

Сүүлийн жилүүдэд Үндэсний компаниуд хөлбөмбөгийн спортыг дэмжин хөрөнгө оруулалтуудыг ихээр хийж, энэхүү спортын хөгжил хурдасч, манай шигшээ багийн үзүүлэх амжилтууд, чансаа нь жил ирэх тусам сайжирсаар байна. Мөн цаашид ч Монгол улсынхаа нэрийг олон улсад гаргах Үндэсний шигшээ багийнхаа амжилтыг бататган ахиулахын төлөө тоглолтын бэлтгэл, тэмцээнүүдэд ХХБанк хамтран ажиллах юм.