Ц.Цэрэнпунцаг гарьд “Aspire Mining” дахь эзэмшлээ 52.5 хувь болгон ДАХИН ӨСГӨЛӨӨ

Австралийн Хөрөнгийн биржид бүртгэлтэй “Aspire Mining” компанийн хувьцааны 51 хувийг Монгол Улсын гарьд Ц.Цэрэнпунцаг эзэмших болсныг өмнө нь мэдээлсэн.

Тэгвэл тэрбээр хувь эзэмшлээ 1.5 хувиар нэмэгдүүлж, нийт хувьцааны 52.5 хувийг эзэмшигч болжээ. Тодруулбал, 2.75 сая ам.долларын нэмэлт санхүүжилт хийсэн байна.

Сануулахад, “Aspire Mining” компани өнгөрсөн есдүгээр сард  27.5 хувийн хувьцааг эзэмшигч Ц.Цэрэнпунцагтай 33.5 сая ам.долларын хөрөнгө татах чиглэлээр хувьцаа захиалгын гэрээ байгуулж байсан юм. Улмаар Ц.Цэрэнпунцаг гарьд хувьцаа эзэмшлээ 51 хувь болгон нэмэгдүүлснээр, компанийн гүйцэтгэх удирдлагын багийг өөрийн хүмүүстээ хариуцуулсан. Д.Ачит-Эрдэнэ “Aspire Mining” компанийн Гүйцэтгэх захирлаар ажиллаж эхлээд байгаа юм. 

Дашрамд дурдахад,  “Aspire mining” компанийн “мэдэл” дэх  Стратегийн гэх тодотголтой Могойн голын ордын нэг хэсэг болох Овоот ордын түүх адармаатай.  2007 онд  “Хургатай хайрхан” компани Могойн голын ордын 9350 га газрыг хэсэгчлэн авч, Ашигт малтмалын газартай “ойлголцон” Овоот  гэж нэрийдсэн байдаг. Түүнчлэн орон нутгийнхны зөвшөөрлийг авалгүй өөрийн болгосон “шинэ” ордоо “Aspire mining” компанид худалдсан түүхтэй.

Харин “Aspire mining” компанийн зүгээс байр сууриа илэрхийлэхдээ “Овоот төслийг цаашид амжилттай хэрэгжүүлэх нь Монголын хойд бүс дэх Овоотын ордоос Эрдэнэтийн Транс-Монголын төмөр замтай холбогдох төмөр замын дэд бүтцийн бүтээн байгуулалттай шууд холбоотой. Монгол Улсын хувьд ихээхэн ач холбогдол бүхий  төмөр замын дэд бүтцийн барьж байгуулах ажлыг манай салбар компани гүйцэтгэнэ” гэж байсан юм.