2019: HOT NEWS

Улиран одож буй 2019 онд соёл, урлаг, спортын салбарт дуулиан тарьж, Zindaa.mn сайтад хамгийн өндөр хандалт авсан эрхмүүдийг энэ удаагийнхаа дугаарт онцлон хүргэж байна.

Алдрын эзэд

Өнгөрөн одож буй жилд улс эх орныхоо нэрийг алдрын тавцанд цуурайтуулсан олон эрхмүүд бий. Тухайлбал дэлхий дахинаа Монгол хэл, соёлыг сурталчлан өөрсдийн өнгө төрхөөр байлдан дагуулж буй “The Hu” хамтлаг дэлхийн шилдэг клип болон шилдэг дууны эзэд болоод буй. Харин оюун ухааны спортын тамирчид орсон тэмцээн бүрдээ тэргүүлж “Гайхамшигт хүмүүс” нэвтрүүлэгт уригдан өөрсдийн чадварыг дэлхий нийтэд таниулсан. Мөн реппэр Рокит Бэй дэлхийн хэмжээний “The World’s Best” шоуны шүүгчээр ажилласан бол уг шоунд дуучин О.Энх-Эрдэнэ оролцож чамлахааргүй амжилт үзүүлсэн билээ.

Дуулиант хосууд

2019 оны хамгийн дуулиант хосуудын тэргүүн эгнээнд дуучин Г.Ариунбаатар болон түүний гэргий жүжигчин Б.Баярмаа нар бичигдэнэ. Гурван жилийн турш харилцаагаа нууцалж байсан тэд өнгөрсөн долоодугаар сард эх орондоо амрахаар ирсэн нь манай зурагчны дуранд буусан нь энэ. Хосууд дундаасаа хоёр хүүтэй. Харин эдгээр өдрүүдэд тэд бага хүүгээ дагуулан эх орондоо ирсэн байна. Дуучин Г.Ариунбаатар Марийнскийн театрт ажиллаж байгаа учир дуучны гэр бүл Санктпетербург хотноо төвхнөөд буй ажээ.

Дуулиант хурим

Оны хамгийн дуулиант хуримаар дуучин Ч.Уранхолбоогийн хурим шалгараад байна. Таван охидын ээж болсон тэрбээр нөхөр Б.Түвшинбаяртайгаа энэ оны есдүгээр сарын есний өдөр албан ёсоор гал голомтоо бадрааж, аз жаргалтай гэр бүлийн тоог нэгээр нэмсэн. Хуримлагч хосууд гэрлэх ёслолын ордноос улсын төв талбай хүртэл  цагаан өнгийн сүйх тэргээр явсан нь тун ч өвөрмөц шийдэл байсан. Мөн цэцгийн дэлбээ шиг таван охиноороо гоёсон нь энэ өдрийн хамгийн том чимэг байлаа.

Шинэ хосууд

Улиран одож буй 2019 онд олны танил олон эрхмүүд ганц бие амьдралаас хосын амьдралд шилжжээ. Спортын салбарт гавьяат тамирчин Н.Төгсцогт ганц бие амьдралдаа цэг тавьж Э.Энэрэл хэмээх фото модель бүсгүйг найз бүсгүйгээрээ сонгосон. Урлагийнхан дундаас мэндэлсэн отгон хосуудын тоог жүжигчин Б.Тамир, А.Ганчимэг нар нэмсэн байна. Харин дуучин Э.Чулуунчимэг улсын начин Д.Цэрэнтогтохтой хайр дурлалын романс үүсгэж шуугиан дэгдээгээд буй бол жүжигчин М.Баярбат мөн шинэ найз бүсгүйтэй болжээ.

Бүл нэмлээ

“Номин талст” хамтлагийн дуучин Т.Дэлгэрмөрөнгийн гэргий Т.Ананда энэ оны дөрөвдүгээр сард охин төрүүлж бүл нэмсэн. Үүний дараа “Гурван охин” хамтлагийн дуучин Х.Ану өнгөрөгч тавдугаар сард анхны хүүхдээ өлгийдөн авсан. Харин түүнтэй нэр нэгт дуучин С.Ану долоодугаар сард хүүтэй болсон бөгөөд түүнийг реппэр Рокит Бэйн эхнэр гэдгээр нь олон нийт сайн мэднэ. Загварын салбар ч мөн шинэ хүнээ угтан авчээ. Загвар өмсөгч Ю.Балжидмаа болон түүний нөхөр Г.Анархүү нар өнгөрөгч есдүгээр сард хүүтэй болсон билээ. Харин спортын салбарт гавьяат тамирчин П.Орхон амаржиж бүл нэмж хүүтэй болсон байна.

Богино хугацаанд нэрд гарсан нь

Энэ жилийн хувьд хамгийн богино хугацаанд нэрд гарч, олны анхаарлын төвд орсон уран бүтээлчдээр “Миний муужгай” дууны уран бүтээлчид болох Loce, 168 нар тодроод байна. Өвөрмөц стиль, өөр өнгө төрхөөр олны анхаарлыг эрхгүй булаасан тэд бүхий л арга хэмжээ, телевизийн нэвтрүүлэг, ярилцлагуудад оролцож буй.  Үүнээс өмнө тодорхой хүрээлэл дундаа танигдсан байсан тэд өдгөө найман настай балчираас наян настай буурал хүртэл танигджээ.

Онцлох кино

Оны онцлох кино бүтээлээр “Фантастик” продакшны арван жилийн ойдоо зориулан бүтээсэн “37-р точка” кино шалгарлаа. Тус киноны нэгдүгээр бүлэг үзэгчдийн хүртээл болсон даруйдаа шуугиан тарьсан. Дэлхийн хэмжээнд алдаршсан олон ангит кино бүтээлүүдийн жишигт нийцсэн тус киноны хоёрдугаар бүлэг тун удахгүй үзэгчдийн хүртээл болно. Үзэгчдийн хүлээлт үргэлжилсээр л...