ХЭРГИЙН ГАЗАР: 13 давхраас унаж нас барсан газраас гурван хүний гутлын мөр олджээ

Нийслэлийн Чингэлтэй дүүрэгт байрлах орон сууцны 13 давхраас дахин нэг хүн унаж нас барсан харамсалтай хэрэг гарчээ.

Дээрх хэргийн мөрөөр манай сурвалжлагчийг очих үед цагдаагийн албаныхан хэргийн газрын үзлэг шалгалтаа дуусгаж, тус орон сууцыг битүүмжлээд байсан юм. Түүнчлэн хэрэг гарсан орц руу орох нууц дугаарыг сольж, оршин суугчдаас бусад хүмүүсийг нэвтрүүлэхгүй байх чиглэл өгсөн байлаа.

Тус газарт гарсан энэхүү хэргийн талаар хөршүүдээс лавлахад, зарим нь дургүйцэн хүлээн авч байсан юм. Учир нь хэрэг гарсан орон сууц нь хотын төвийн “А” зэрэглэлийн бүс буюу Улсын их дэлгүүрийн ойролцоо байрладаг. Байрлалаасаа хамаарч эзэмшигч нар байраа худалдаа үйлчилгээний зориулалтаар бусдад түрээслүүлж орлого олдог учир  тодорхой мэдээлэл өгөхөөс татгалзсан юм.
 

Харин хэрэг гарсан орцны ... давхарт байр түрээслэн амьдардаг иргэдийн хэлж байгаагаар “Шинэ жилийн баярын өнгөрөөд гэртээ ирэх үед цагдаа нар нэгдүгээр сарын 2-ны өдөр хаана байсан тухай лавлаж асуусан. Бидний хувьд баяраар хамаатныхаараа зочилж яваад ирсэн учраас тухайн үед юу болсон талаар ямар ч мэдээлэл байгаагүй. Харин сүүлд сонсоход хамгийн дээд давхраас эрэгтэй хүн уначихсан. Хамт байсан хүмүүсээс нь дутаж байгаа гэж байсан. Тэгээд л оршин суугчдаас хэрэг гарах үед хаана байгааг асууж байсан юм билээ” гэсэн юм.

Энэхүү хэргийг одоогоор Чингэлтэй дүүргийн гуравдугаар хэлтэст шалгаж байгаа ба талийгаачтай ойр байсан хүмүүсээс тайлбар мэдүүлэг авч эхэлжээ. Түүнчлэн амь хохирогч эрэгтэй амиа алдахаасаа өмнө архи согтууруулах ундааны зүйл хэрэглэсэн байсан нь урьдчилсан байдлаар тогтоогдсон байна. Харин талийгаач 13 давхрын тагтнаас гаднын нөлөөтэй унасан уу эсвэл амиа хорлосон уу гэдгийг тогтоохоор шүүхийн шинжээчид ажиллаж байгаа талаар эх сурвалж мэдээллээ.

Бидэнд олдсон мэдээллээр амь хохирогч эрэгтэй нь хэрэг гарсан тус байранд амьдардаггүй бөгөөд нийслэлийн Хан-Уул дүүрэгт байрлах “Буянт-Ухаа” хороололд оршин суух хаягтай 28 настай Г байжээ.

Шалгалтын үеэр хэргийн газраас хэд хэдэн хөлийн мөр олдсон бөгөөд эдгээр баримтуудыг нягтлан шалгах ажиллагааг цагдаагийн байгууллагаас явуулж байгаа ажээ.