Ломбардаас мөнгө, үнэт эдлэл дээрэмдсэн этгээдүүдийг баривчиллаа

2020 оны 04 сарын 05


Баянзүрх дүүргийн 17 дугаар хороо Цахлайн тойргийн “Сайн” ломбардад 2020 оны гуравдугаар сарын 30-ны өдөр 14 цагийн үед “Үл таних масктай хоёр этгээд дайрч орж ирээд, айлган сүрдүүлж, эд зүйл дээрэмдлээ” гэх дуудлага мэдээлэл 102 дугаарын утсаар иржээ.

Тодруулбал, баг өмссөн хоёр эрэгтэй, ломбардын ажилтныг айлган сүрдүүлж, зэвсгийн чанартай зүйл ашиглан, 11 сая орчим төгрөг бэлнээр, 1000 гаруй иргэний барьцаалан зээлдэх гэрээтэй 300 гаруй сая төгрөгийн үнэ бүхий үнэт эдлэл дээрэмдэж, хэргийн газраас зугтжээ.

Дээрэмчид битүү баг өмссөн байснаас илрүүлэх ажиллагаа хэцүү байсан ч НЦГ-ын Мөрдөн шалгах газар, Баянзүрх дүүрэг дэх цагдаагийн газар, тус газрын гуравдугаар хэлтсийн алба хаагчид шуурхай ажиллан 96 цагийн дотор дээрэмдсэн эд зүйл болон бэлэн мөнгийг эд мөрийн баримтаар хураан авч илрүүлэн баривчилж, шалгалтын ажиллагаа хийгдэж байна.

Дээрмийн гэмт хэргийг тодорхой эрхэлсэн ажилгүй 35 настай Э, 34 настай Д, 31 настай М нар бүлэглэн үгсэн тохиролцож, урьдаас төлөвлөж үйлдсэн нь мөрдөн байцаалтын явцад тогтоогдсон.

Тухайн этгээдүүд урьд нь хүн амь, дээрэмдэх, хулгайн гэмт хэрэг үйлдэн ял эдэлж байсан ба мөрдөн байцаалтын явцад Сүхбаатар дүүргийн нутаг дэвсгэрт зэвсгийн чанартай зүйл ашиглан дээрэмдэх гэмт хэрэг үйлдсэн нь илрэн шалгагдаж байгаа аж.

Тэдэнд Эрүүгийн хуулийн тусгай ангийн 17.2.2-т зааснаар эрүүгийн хэрэг үүсгэн, Баянзүрх дүүрэг дэх цагдаагийн газрын гуравдугаар хэлтэст шалгаж байна.

Харин "Сайн" ломбард нь аюулгүй байдлаа хангах “Барьцаалан зээлдүүлэх үйлчилгээ үзүүлэх стандарт шаардлага” дагаж мөрдөөгүйгээс гэмт этгээдүүдэд боломж олгосон, гэмт хэргээс урьдчилан сэргийлэх тодорхой ажил, арга хэмжээ зохион байгуулаагүйгээс дээрх гэмт хэрэг гарсан байх магадлалтай бөгөөд тухайн аж ахуйн нэгжийг Гэмт хэрэг, зөрчлөөс урьдчилан сэргийлэх тухай хууль, тус цагдаагийн газраас өгсөн “Мэдэгдэл”-ийн мөрөөр хэрхэн ажил зохион байгуулсан эсэхийг шалгана.

Баянзүрх дүүрэг дэх цагдаагийн газраас 2019 онд хариуцсан хороодын нутаг дэвсгэрт үйл ажиллагаа явуулдаг нийт аж ахуй нэгжүүдэд гэмт хэрэг, зөрчлөөс урьдчилан сэргийлэх ажлын хүрээнд  “Мэдэгдэл” өгч, биелэлтэд хяналт шалгалт явуулж ажилласнаар байгууллага, аж ахуй нэгжид үйлдэгдэх гэмт хэргийн гаралт тодорхой хувиар буурсан эерэг үзүүлэлттэй байсан.

Баянзүрх дүүрэг дэх цагдаагийн газраас гэмт хэрэг, зөрчлөөс урьдчилан сэргийлэх чиглэлээр 2020 онд хариуцсан нийт 28 хороодын нутаг дэвсгэрт үйл ажиллагаа явуулдаг нийт 1650 аж ахуй нэгжүүдэд мэдэгдэл шаардлага хүргүүлэн биелэлтэд хяналт тавьж “Мэдэгдэл-Хяналт шалгалт” арга хэмжээг зохион байгуулан ажиллаж, зөрчил гаргуулахгүй байх, гарсан зөрчлийг арилгуулах чиглэлээр зохион байгуулалтын арга хэмжээ авч ажиллаж байна.

Нийт аж ахуйн нэгж байгууллагад аюулгүй байдлаа хангах, хууль дүрэм журмын дагуу үйл ажиллагаа эрхлэн явуулахыг тус цагдаагийн газраас анхааруулж байна.

Сэтгэгдэл ( 2 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Su ah(202.179.26.102) 2020 оны 04 сарын 05

Мөнгө хүүлэгчдэд дургүй нь хүрсэн болтой

0  |  0
irgen(31.165.215.200) 2020 оны 04 сарын 05

hairan saihan nas …iim umnuud estoi niigemd hereggui zasrahgui gemt heregtengyyd bna, urd gemt hergeer shorond orood zasraagui ulsuud yaj nasiig barnaa

0  |  0
Top