Буриадууд Богомоевыг гурав, Цыжиповыг нэг өрөө байраар шагнав

Чөлөөт бөхийн Европын аварга шалгаруулах тэмцээн өнгөрсөн хоёрдугаар сард Италийн нийслэл Ромд болсон билээ.

ОХУ-ыг төлөөлж 61 кг-ын жинд түрүүлсэн Александр Богомоев, 125 кг-д хүрэл медаль хүртсэн Балдан Цыжипов нарыг Буриадын “Бэстплюс”, “Смитинвест”, Забайкалийн уул уурхайн компаниуд хамтран орон сууцаар шагнав.

Буриадууд бөхчүүдээ уг нь дөрөвдүгээр сард Улаан-Үдэд болох ёстой байсан ОХУ-ын аварга шалгаруулах тэмцээний үеэр урамшуулахаар төлөвлөсөн ч хар тахлаас болж тэмцээн цуцлагдснаар өдийг хүрчээ. Буриадын эрэгтэй бөхчүүдээс 38 жилийн дараа Европын аваргаас алтан медаль хүртсэн Богомоевт (Хамгийн сүүлд Борис Будаев 1982 онд аваргалсан) гурав, хүнд жинд анх удаа медаль авчирсан Цыжипов нэг өрөө байраар шагнасан юм.