О.Нарангоо: Миний бэлхүүсний тойрог 50 см, хүмүүс итгэдэггүй

Монголын хамгийн нарийхан бэлхүүстэй О.Нарангоотой ярилцлаа. Түүний бэлхүүсний тойрог 50 гаруй см юм.  О.Нарангоо удахгүй Хотын аварга шалгаруулах фитнесийн тэмцээнд орохоор бэлтгэлээ базааж байгаа аж.

-Өөрийгөө танилцуулахгүй юу. Хүмүүс бэлхүүсийг чинь хараад таньд ямар сэтгэгдэл хэлдэг вэ?

-Намайг Нарангоо гэдэг, 18 настай. Одоогоор Ерөнхий боловсролын сургуульд сурдаг. Хүмүүс надаас "Яаж ийм нарийнхан бэлхүүстэй болсон бэ" гэж их асуудаг. Сошиалд зураг оруулахаар итгэдэггүй. Фотошоп юм уу гэж асуудаг. Зарим хүмүүс эрүүл мэнд талаасаа буруу, хамаг эд эрхтэнээ шахсан гэж хараад байдаг. Гэвч бодит байдал дээр хүний бие жижиг учраас байх ёстой эд эрхтэн байрандаа байгаа. Ямар ч шахагдсан зүйл байхгүй.

-Чиний чөлөөт цагаа зориулдаг, биедээ анхаарал тавьж байгаа энэ байдлыг үе тэнгийн хүүхдүүд нь хэрхэн хүлээж авдаг вэ?

-Анх фитнессээр хичээллэж байхад гадуурхах, шоолох хандлага гардаг байсан. Одоо бол өөрчлөгдсөн. Одоо надаас зөвлөгөө авч, хамт хичээллэж байгаа найзууд олон болсон.

-Хавиргаа хадуулсан мэт нарийхан бэлхүүстэй юм?

-Миний биед ямар ч гаж зүйл байхгүй. Фитнессээр хичээллэж, хоолны дэглэм бариад л ийм болсон.

-Бэлхүүсний тойрог нь хэдэн см вэ?

-Сүүлд “Aya corset”-ийг захиалж байхад 60 см байсан. Одоо тэр хэмжээнээс багасаад 50 руу орсон.

-Өөрийг чинь Монголын хамгийн нарийн бэлхүүстэй эмэгтэй гэж тодотгож болох уу?

-Мэдэхгүй байна. Надаас ч нарийн бэлхүүстэй хүн байж магадгүй.
 

-Ийм нарийхан бэлхүүстэй болоход сөрөг нөлөө үнэхээр байхгүй юу?

-Хүүхэд гаргахаас хэдэн сарын өмнө бэлтгэлээ зогсоосон байх ёстой гэж багш хэлдэг. Гэхдээ би ойрын хэдэн жилдээ хүүхэд гаргах төлөвлөгөө байхгүй. Ер нь эмэгтэй хүн талаасаа хэрхэн дасгал хийх ёстой вэ гэх мэт зүйлсээ зохицуулдаг, хангалттай мэдээлэлтэй байдаг гэхэд болно. Намайг эрүүл хүн гэдэг утгаар нь харах хэрэгтэй. Яг л хүнтэй адилхан бие организмтай. Гадаадад над шиг биетэй хүн олон байдаг, хүмүүс эерэгээр хүлээж авдаг. Учир нь хүний бие бол жижиг шүү дээ. Өөрөөр хэлбэл, өөх, булчингаараа дараад зарим хүн том биетэй харагддаг. Ялангуяа бэлхүүс бол 60 см байна гэдэг төгс харьцаа юм. Тэгэхээр эд эрхтэн гэмтэх боломжгүй.

-Одоо бэлхүүсээ илүү нарийн болгоно гэж бодож байна уу?

-Тамирчин хүн гэдэг талаасаа миний өөхний хэмжээ бага зэрэг илүү байгаа. Энгийн үед бол энэ жингээ бариад явна. Харин тэмцээн ойртсон үед өөхний хэмжээгээ хасах ёстой. 

-Хэдэн жил фитнессээр хичээллэж байгаа вэ?

-Одоо гурав дахь жилдээ хичээллэж байна. Өдөрт хамгийн багадаа гурван цаг фитнессээр хичээллэдэг. Тэмцээний бэлтгэлтэй үед зургаан цаг ч хичээллэх үе бий.

-Шантрах үе гардаг уу?

-Шантрах үе байдаг. Хоолны дэглэм барихаас эхлээд өдөр бүр бэлтгэл хийдэг учраас зарим үед шантардаг. Тэр үед өөртөө багахан амралт өгөөд, дахин эхэлдэг. Түүнээс фитнессээ орхие гэсэн бодол төрж байгаагүй. Учир нь фитнессээр хичээллэсэн үр шимийг тэр дороо мэдэрдэг учраас урамтай байдаг.

-Шантарсан үед юунаас урам авдаг вэ?

-Дасгал хийхээр бие булардаг. Тэр нь булчингийн ширхэг тасарч, шинэ булчин ургаж эхэлж байна гэсэн үг. Ийм мэдрэмжийг аваад, хоол идэхээр булчин сэргээд чанартай болж эхэлдэг. Өөхөө хасаад, галбиртай болоод ирэхээр биед гарч буй өөрчлөлтүүдийг илүү сайн анзаарч эхэлдэг. Энэ өөрчлөлтөөсөө урам авдаг.

-Өөр шиг чинь ийм нарийхан бэлхүүстэй болохын тулд ямар хоол идэж, ямар дэглэм барих шаардлагатай вэ?

-Зорилгоо тодорхойлоод, сэтгэл зүйгээ бэлдэх хэрэгтэй. Бэлтгэл сургуулилтаас илүү хоолны дэглэм хамгийн хэцүү байдаг. Эхэлж байгаа үед гурил, будаа, чихэр идэхгүй байх нь зүйтэй. Би яг одоогоор бол хүнд дэглэм барьж байгаа. Зөвхөн төмс, тахианы цээж мах, өндөг, нарийн ногоо иддэг. Ийм хоол идээд бэлтгэл хийгээд байхаар биед хуримтлагдсан өөх хайлж, булчингийн хэмжээ нэмэгддэг. Би тэмцээнд бэлтгэж эхлэхээсөө өмнө 58 кг байсан. Одоо биед хуримтлагдсан өөхөө хассан боловч 56 кг байгаа. Яагаад гэвэл булчингийн хэмжээгээ нэмээд явж байгаа учраас ийм хэмжээний жинтэй байна гэсэн үг.

-Фитнесст явж эхлэхдээ өөртөө ямар нэг зорилго тавьж байсан бэ?

-Эхлэхээсээ өмнө дасгал хөдөлгөөнд дуртай, өглөө их гүйдэг байсан. Ингээд фитнесст явж эхлээд өглөө бэлтгэл эхлэхийн өмнө буюу заал нээгдээгүй байхад л тэнд очоод дасгалаа хийдэг байсан. Ийм тийм болно гэж зорилго тавиагүй. Зүгээр л фитнесст дурлаж эхлүүлсэн. Би анх тийм ч тарган байгаагүй. Гэхдээ өөх ихтэй, сул биетэй байсан. Бэлтгэлийн явцад бага багаар биеэ чангалаад явсан.

-Чамайг фитнесс тамирчин болно гэхэд аав, ээж, ойр тойрны хүмүүс нь яаж хүлээж авсан бэ?

-Эерэг хүлээж авсан. Миний эгч фитнесс тамирчин. Бид гэр бүлээрээ дасгал хийдэг. Тэд маань хэтрүүлж болохгүй шүү гэж л сануулдаг. 

-Удахгүй тэмцээнд орох юм байна?

-Тийм. Аравдугаар сарын 18-нд Хотын аварга шалгаруулах тэмцээнд орно. Энэ тэмцээнд хоёр дахь удаагаа орж байна. Анхны тэмцээн хоёр жилийн өмнө болсон. Түүнээс хойш бэлтгэж байгаад одоо орж байна.

-Ярилцсанд баярлалаа. Тэмцээнд нь амжилт хүсье.