АНХААР | Халдвар илэрсэн хүмүүс Караоке, буудлаар үйлчлүүлснээ НУУЖЭЭ

Өнөөдөр өглөө 11:00 цагаас мэдээлэл хийснээс хойш манай улсын хувьд Ковид-19 халдварын батлагдсан тохиолдол есөөр нэмэгдэж, нийт 426 тохиолдол болоод байна.

Эх сурвалжийн мэдээлснээр "Энхсаран" сувилалд тусгаарлагдаж байгаад гарсан жолооч Д-гийн ойрын хавьтал болох ахын эхнэр болон түүний хүүгээс халдвар илэрч, онош батлагдсан байна.

Халдвар авсан сурагч хүү Нийслэлийн ерөнхий боловсролын ... дугаар сургуулийн 10-р ангид сурдаг ба тухайн үед хичээлдээ явж байсан гэх мэдээлэл байна. Тиймээс сурагчдын дунд халдвар тархсан байж болзошгүй эрсдэл үүсжээ. 

Халдвар авсан жолооч Д явсан маршрутаа ташаа мэдүүлсэн талаар өмнө бид мэдээлж байсан. Тэгвэл халдвартай нь тогтоогдсон түүний ойрын хавьтлын хүн караоке, зочид буудал, цайны газар зэргээр үйлчлүүлснээр мөн мэдүүлээгүй байжээ.

Энэ байдал удаа дараа давтагдаж байгаа нь халдварын тархалтыг хумихад хүндрэл учруулж байна. 

Энэ талаар мөн Эрүүл мэндийн сайд асан Д.Сарангэрэл "Жолооч Д-гийн ахынх нь эхнэр, хүүхэд хоёроос халдвар илэрчээ. Тиймэс вирус илэрсэн хүмүүстэй ямар нэгэн байдлаар холбогдсон хүмүүс хаагуур явсан, хэнтэй уулзсанаа нуулгүй хэлж, бүхнийг маш сайн эргэн санах хэрэгтэй. Хөл хорио дуусах гэж байхад дахин ойрын хавьтлаас халдвар илэрч буй нь том эрсдэл" гэж олон нийтийн сүлжээнд мэдэгдээд байна. 

ЭМЯ-наас үүнтэй холбогдуулан 2020 оны арваннэгдүгээр сарын 09-ний өдөр "ТОПАЗ" зочид буудал, Сүхбаатар дүүргийн 8-р хорооны "Говь сайхан" караокед 17-20 цагийн хооронд, мөн тус хорооны "Өгөөж-1" цайны газраар 12-14 цагт үйлчлүүлсэн иргэдийг ЭМЯ-ны 119, ХӨСҮТ-ийн 80056829 дугаарт холбогдож зөвлөгөө, зөвлөмж авахыг сануулж, анхаарууллаа. 

Өнөөдөр 19:00 цагийн байдлаар шинээр илэрсэн есөн тохиолдол
 

• Эхний тохиолдол буюу ачаа тээврийн жолоочийн хавьтал - 3
• Сөүл-Улаанбаатарын нислэгээр ирсэн иргэдийн давтан шинжилгээнээс - 4
• "Алтанбулаг" боомтоор орж ирсэн - 1
• ХӨСҮТ-ийн эмч - 1

КОВИД-19 БА МОНГОЛЫН НӨХЦӨЛ БАЙДАЛ (2020.11.14)

НИЙТ ХАЛДВАР АВСАН ХҮНИЙ ТОО - 426

Зөөвөрлөгдсөн - 405

Дотоодод бүртгэгдсэн халдварын тоо - 21
 

УЛААНБААТАР (ЖОЛООЧИЙН ХАВЬТАЛ) - 10
 

• Улаанбаатарт бүртгэгдсэн ачаа тээврийн жолооч болон түүний эхнэрээс 2020.11.10-нд халдвар илэрсэн.
• Жолооч, эхнэр хоёрын ойрын хавьтал болох ээж, дүүгээс нь 2020.11.11-нд халдвар илэрсэн.
• Жолоочийн дүүгийн ойрын хавьтал хоёр оюутнаас 2020.11.12-нд халдвар илэрсэн.
• Жолоочийн  4 настай хүүхдээс 2020.11.13-нд халдвар илэрсэн.
• Жолоочийн ахын эхнэр болон ахынх нь том хүүгээс 2020.11.14-нд буюу өнөөдөр халдвар илэрлээ. 
• Жолоочийн бага охиноос 2020.11.14-нд буюу өнөөдөр халдвар илэрлээ. 

ХӨСҮТ-ИЙН ЭМЧ, СУВИЛАГЧ, АЖИЛЧИД - 8
 

• Эхний халдвар Сэлэнгэ аймгийн Нэгдсэн эмнэлгээс ХӨСҮТ-д ирж ажиллаж байсан сувилагчаас 2020.11.06-нд илэрсэн.
• Дараагийн халдвар 2020.11.10-нд халдвар авсан сувилагчтай нэг багт ажиллаж байсан эмчээс илрэв.
• Ингээд 2020.11.14-ний 17:00 цагийн байдлаар ХӨСҮТ-д ажиллаж байгаа эмч, сувилагчдаас дөрвөн эмч, хоёр сувилагч, хоёр асрагч, нийт 8 хүн халдвар авсныг ЭМЯ мэдээллээ. 

СЭЛЭНГЭ АЙМАГ (ШИНЭ ГОЛОМТ ГЭЖ ҮЗЭЖ БАЙГАА) - 3
 

• Эхний тохиолдол аймгийн Нэгдсэн эмнэлгээр үйлчлүүлсэн 70 настай эмэгтэйд 2020.11.12-нд илрэв. 
• 70 настай эмэгтэйтэй хамт амьдардаг бэр халдвар илэрснийг 2020.11.13-нд зарлав.
• 70 настай эмэгтэйтэй хамт амьдардаг ач хүүгээс нь халдвар илэрснийг 2020.11.13-нд зарлав.