ЦЕГ: Хэнтий аймагт замд орхисон машин тоносон хоёр этгээдийг саатууллаа

Хэнтий аймгийн нэгдсэн зарын фэйсбүүк группд 2021 оны нэгдүгээр сарын 01-ний өдрийн 14:00 цагт “Negune” гэх цахим хаягаас “Хэнтийн Өмнөдэлгэрийнхэн гэж ийм хүн чанаргүй мөсгүй байж болохгүй ээ, өвлийн хүйтэнд эврээд зогссон машиныг ингэж тонож байдаг арай ч дээ, баяраар хулгай хийгээд явж байдаг арай ч дээ” гэх мэдээллийг байршуулснаас хойш цахим мэдээллийн хэрэгслээр олон нийтэд түгсэн байсныг Өмнөдэлгэр сумын хэсгийн төлөөлөгч, цагдаагийн дэслэгч Б.Тэмүүжин уг гэмт хэргийн шинжтэй гомдол мэдээллийг цагдаагийн байгууллагын нэгдсэн санд бүртгэлд оруулж мөрдөн шалгах ажиллагааг эхлүүлсэн байна.

Шалгалтын ажиллагаагаар иргэн Б гэгч нь 2020 оны арванхоёрдугаар сарын 28-ны өдөр цагаан өнгийн приус маркийн автомашинтай Улаанбаатар хотоос Хэнтий аймгийн Батширээт сум руу явах замд эвдэрч явах боломжгүй болоод Өмнөдэлгэр сумын 2 дугаар багийн нутаг “Хурхийн бургас” гэх газарт үлдээгээд 2021 оны нэгдүгээр сарын 01-ний өдөр машинаа авахаар очиход аккумулятор, ком батарей, гурван ширхэг обудтай дугуй зэрэг тоногдсон байсан аж.

Хэнтий аймгийн Өмнөдэлгэр сумын хэсгийн мөрдөгч, цагдаагийн дэслэгч Б.Тэмүүжин уг хэргийг үйлдсэн гэмт этгээдүүдийг шуурхай эрэн сурвалжилж, мөрдөн шалгах ажиллагаа явуулсны үр дүнд Хэнтий аймгийн харьяат 36 настай, эрэгтэй, Б гэгч нь 2020 оны арванхоёрдугаар сарын 31-ний өдөр хадам ах, 38 настай, М-ийн хамт 20:00 цагийн орчимд замд таарсан цагаан өнгийн приус маркийн автомашины урд талын гурван ширхэг обудтай дугуй, ком батарей, аккумлятор зэрэг эд зүйлийг хулгайлан авч гэртээ хадгалж байсныг тогтоон тус хэрэгт холбогдуулан мөрдөн шалгах ажиллагааг явуулж байна.