УОК: Өдөрт 42.000 иргэнээс шинжилгээ авна

Улсын Онцгой комисс өнөөдөр /2021.02.03/ хуралдлаа. Хуралдаанаар сар шинийн баяр болох гэж байгаатай холбогдуулан олон нийтийн бөөгнөрөл үүсгэхгүй байх үүднээс Улаанбаатар хотод хатуу хөл хориог тогтоох эсэх асуудлыг хэлэлцлээ. Учир нь, Эрүүл мэндийн яамнаас хатуу хөл хориог 14 хоногоор тогтоох саналыг өчигдөр /2021.02.02/ Улсын Онцгой комисст хүргүүлсэн байдаг. 

Энэ асуудлаар Улсын Онцгой комисс өчигдөр орой хуралдсан ч тодорхой шийдэлд хүрч чадаагүй юм. Тэгвэл Улсын Онцгой комисс өнөөдрийн хуралдаанаараа Улаанбаатарт тогтоох хатуу хөл хориог энэ сарын 11-ний өдрийн ирэх долоо хоногийн пүрэв гарагийн 06:00 цагаас хоёрдугаар сарын 23-ний өдрийн 06:00 цаг хүртэл 12 хоног тогтоох шийдвэрийг гаргалаа.

Энэ талаар яг одоо Шадар сайд С.Амарсайхан нар мэдээлэл хийж байна. Энэ үеэр Шадар сайд, Улсын Онцгой комиссын дарга С.Амарсайхан "Өнөөдрийн хуралдаанаар цаг үеийн нөхцөл байдалтай холбогдуулан зарим арга хэмжээг авч ажиллах шийдвэрийг гаргалаа. Цар тахалтай тэмцэх стратеги төлөвлөгөөгөө болоьсруулж ажиллаж байна. Ингэхдээ эдийн засгаа бодсон, иргэд болон аж ахуйн нэгжээ дэмжсэн бодлогыг баримталж байна. Засгийн газраас цар тахлын цаг үеийн эрсдэл багатай туулах зорилт тавьж ажиллаж байна. Харин өнөөдрийн Улсын Онцгой комиссын хуралдаанаар хатуу хөл хориог Улаанбаатар хотод сар шинийн баярын өдрийг тохиолдуулан цар тахлыг зарим голомтыг хумих үүднээс тогтоох нь зүйтэй гэж үзлээ" гэв. 

Түүнчлэн "Цагаан сараар халдвар тархах нөхцөлийг бүрдүүлэх эрсдэл өндөр байна. Тиймээс Улаанбаатар хотод хатуу хөл хорио тогтоосон хугацаанд компанит ажлаа явуулна. Халдварыг дөрөв дахин бууруулна. Өнөөдрийн байдлаар 20 гаруй голомт байна. Тархалт идэвхтэй байх хандлага байна. Олон нийтийн хөдөлгөөнийг хязгаарлана. Нэг хаалга, нэг шинжилгээ хийнэ.  Хөл хориойг хоёрдугаар сарын 11-ний өдрөөс 23-ний өдрийн 06:00 цаг хүртэл хөл хорино. Энэ хоногт 420 мянга гаруй айлд шинжилгээг хийх ажлыг зохион байгуулна. Анх удаа хийж байгаа болохоор алдаа, дутагдал гаргахыг үгүйсгэхгүй. Гэхдээ алдаа гаргахгүй ажиллахыг зорьж, ажиллана. Өдөрт 42 мянган шинжилгээг хийнэ гэж төлөвлөж байна. Шинжилгээний цэгийг 73 цэгт байгуулна. Зарим тохиолдолд хөдөлгөөнт шинжилгээний газрыг ажиллуулна. Эмнэлгийн зайлшгүй тусламж, эмийн сангийн үйлчилгээ, зөөврийн ус, түлшний худалдан авалт, буяны үйл ажиллагааг зөвшөөрнө. Өрхийн нэг хүн зөвшөөрсөн цэгээс хүнсний худалдаа хийнэ. Тэр үед QR кодоо заавал уншуулна. Оршуулгын үйл ажиллагаанд гэр бүл, ойр дотны хүмүүс л оролцоно. Нийтийн тээврийн хэрэгсэл үйлчилгээнд 07:00-10:00, 17:00-20:00 цагт л явна. Айл хэсэхгүй, гэрээс гарахыг хориглоно. Ахуйн архидалтыг хязгаарлаж, хориглоно. Хяналт тавьж ажиллана. Хүнсний худалдаа хэвийн үргэлжилнэ. Банкны цахим машины үйл ажиллагаа ажиллана. Сайжруулсан түлшний цэгүүд хэвийн явагдана" гэлээ. 

Улсын Онцгой комиссоос гаргасан дээрх шийдвэрийг маргааш /2021.02.04/ болох Засгийн газар ээлжит бусаар хуралдаж, баталгаажуулахаар төлөвлөсөн байна.