Ц.Насанбат прокурорын үйлдлээр ТӨБЗГ, “Эрдэнэт үйлдвэр”, “Эрдэнэс Оюу толгой” эрсдэлд оржээ

Ц.Насанбат прокуророос болж гадны шүүхийн маргаанд Төрийн өмчийн бодлого, зохицуулалтын газар, “Эрдэнэт үйлдвэр” ТӨҮГ, “Эрдэнэс Оюу толгой” байгууллагууд учруулсан хохирлыг барагдуулах төлбөрт унахаар болчихжээ.

УИХ-ын гишүүн Сү.Батболдын хуульчид Нью-Йоркийн шүүхэд хандан Ерөнхийлөгч Х.Баттулгын улс төрийн захиалгат үйлдлийг биелүүлж буй этгээдүүдийг ил болгох нэхэмжлэл гаргасан талаар Bloomberg агентлаг мэдээлсэн. Гадны улс орон дамнан явуулж буй хууль шүүхийн ард Монгол Улсын Засгийн газар, дээрх нэр бүхий төрийн болон байгууллагууд асар их хэмжээний хохирол хүлээж болзошгүй нөхцөл  байдал үүсч байгаа юм байна.

Монголын талаас Сингапурын Дээд шүүхийн маргаан дээр Нийслэлийн Ерөнхий прокурорын орлогч Ц.Насанбат тэргүүтэй прокурорын байгууллага төрийн нэр бүхий байгууллагуудын өмнөөс нэхэмжлэгчээр оролцож байгаа. Тэднийг “Rev Law” ХХК шүүхэд төлөөлж оролцохоор болсон. Гадны шүүхээс зарга, гомдлыг хянан хэлэлцэх хүрээндээ гадаад улсын, гадны иргэдийн өмч хөрөнгийг царцаах буюу эл хэрэг шалгагдаж дуустал хөдөлгөөн хийхийг түр хориглосон шийдвэр гаргасан.  

Аливаа улсад шүүхээс гарах шийдвэрийн баталгаа болгож, хариуцагч этгээдүүдийн хөрөнгийг битүүмжлэх, тодорхой үйл ажиллагаа явуулах, шийдвэр гаргах эрхийг хязгаарлах арга хэмжээ авдаг.

Ийм арга хэмжээ авахдаа тухайн арга хэмжээг авсны улмаас бусдад учрах хохирол, зардлыг хүсэлт гаргасан этгээд хариуцахыг урьдчилан сануулдаг. Нэхэмжлэгч талын хүсэлтээр бусдын хөрөнгийг царцаах шийдвэрийг гадны шүүхээс гаргахдаа “Хэрвээ шүүхийн явцад бусдын хөрөнгийг царцаасны улмаас хохирол учирвал нэхэмжлэгч тал төлнө” утга бүхий баталгаат гарын үсэг зуруулдаг.

Тэгэхээр Сингапурын шүүхэд болон бусад орны шүүхэд нэхэмжлэгч талыг төлөөлж буй Ц.Насанбат прокурорын гарган өгсөн баталгаагаар хөрөнгө битүүмжлэх арга хэмжээг авагдсан гэсэн үг.

Хөрөнгийг царцаасан гадны компани, гадаад иргэдтэй хариуцагч гэгдээд буй Сү.Батболд нарын хүмүүс ямар ч холбоогүй болохоо хуульчдынх нь зүгээс нотлох баримтуудаа гаргаад өгөөд байгаа аж.

Гадны шүүхээр явж буй уг хэрэг, зарга анхнаасаа үндэслэл муутай гэдэг нь тогтоогдож, АНУ-ын Нью-Йоркийн шүүх Монгол Улсын нэр бүхий иргэд болон гадаад улсын иргэн хуулийн этгээдийн хөрөнгийг битүүмжлэх агуулга бүхий нэхэмжлэлтэй маргааныг хэлэлцэх үндэслэлгү байна гэж шийдвэрлэсэн.    

Тэгэхээр гадаад улсын, гадны иргэдийн өмч хөрөнгийг царцаасан, түүнтэй холбогдох учруулсан хохирол нэхэмжлэгдэх магадлал өндөр. Хохирлоо нэхэмжилвэл манай улсаас хэн төлөх вэ гэх асуудал гарч ирж байна.

Ц.Насанбат прокурорын хийсэн будлианаар бол учруулсан хохирлыг Нэхэмжлэгч талуудын нэрийн өмнөөс харилцан арилгах үүрэг хүлээх баталгаа гаргах эрхийг олгосон болж таарч байгаа Төрийн өмчийн бодлого, зохицуулалтын газар, “Эрдэнэт үйлдвэр” ТӨҮГ, “Эрдэнэс Оюу Толгой” ХХК-иуд уг хариуцлагыг хүлээхийг хүлээн зөвшөөрсөн гэсэн үг болж буй талаар өмгөөлөгч нар хэвлэлд өгсөн ярилцлагадаа онцолжээ. 

Монгол Улсын Засгийн газар, нэхэмжлэлд нэр дурдагдаад байгаа Төрийн өмчийн бодлого, зохицуулалтын газар, “Эрдэнэт үйлдвэр” ТӨҮГ, “Эрдэнэс Оюутолгой” ХХК байгууллагуудад энэ асуудалд анхаарлаа хандуулахгүй бол Ц.Насанбатын харгайгаар тун удахгүй эдийн засгийн ноцтой хохирол учрах хууль зүйн эрсдэл бий болчихож.

Уг нь Монгол Улсын Засгийн газар, Төрийн өмчийн бодлого, зохицуулалтын газар, “Эрдэнэт үйлдвэр” ТӨҮГ, “Эрдэнэс Оюу Толгой” ХХК-иас Сү.Батболдтой холбоотойгоор ямарваа нэгэн нэхэмжлэл, гомдол хуулийн байгууллагуудад гаргаагүй болно гэх утгатай албан бичиг гаргасан байгаа. Баянзүрх дүүргийн шүүхийн хэрэгт Сү.Батболдын хуульч нар хэргийн материалтай танилцахад нэхэмжлэгч гэж нэрлэн заасан дээрх гурван байгууллагын нэр байгаагүй буюу гомдол гаргасан гэх албан баримт байхгүй байгаа аж.

Гэвч Нийслэлийн прокурорын орлогч Ц.Насанбатын гаргасан үйлдлийн улмаас гадны шүүхийн хэрэгт Монгол Улсын Засгийн газар, Төрийн өмчийн бодлого, зохицуулалтын газар, “Эрдэнэт үйлдвэр” ТӨҮГ, “Эрдэнэс Оюу Толгой” ХХК хариуцагчаар унаж, учруулсан хохирлыг төлөх хууль эрхзүйн байдал бий болчихоод байна.

                                                                                          Б.САРУУЛ