Г.Солтан гэм буруугаа хүлээсэн тул Ерөнхийлөгч түүнд уучлал үзүүлжээ

УИХ-ын гишүүн асан Г.Солтанд өчигдөр /2021.03.25/ Ерөнхийлөгч Х.Баттулга уучлал үзүүлсэн аж. Түүнийг өнгөрсөн оны арванхоёрдугаар сарын 18-ны өдөр Улсын Дээд шүүхийн хяналтын шатны эрүүгийн хэргийн шүүх хуралдаанаар анхан болон давж заалдах шатны шүүхийн шийдвэрийг хэвээр үлдээж нийтийн албанд томилогдох эрхийг нь 5 жилийн хугацаагаар хасаж гурван жилийн хорих ял оногдуулсан. Тэгвэл өчигдөр оройноос эхлэн Г.Солтаныг цагаатгасан гэх мэдээллийг түүний ойр тойрны хүмүүс цахим орчин цацаж эхэлсэн. Ерөнхийлөгч Х.Баттулга зарлиг гаргаж, гэм буруугаа хүлээсэн 31 иргэнд уучлалт үзүүлсэн байна. Уучлал үзүүлэх гэдэг нь буруутай этгээд гэмт буруугаа 100 хувь хүлээн зөвшөөрч, уучлал хүссэн тохиолдолд Ерөнхийлөгч бүрэн эрхийнхээ хүрээнд 21 ээж, 10 казак иргэнд уучлал үзүүлсэн аж. 

Г.Солтаныг улс төрд нөлөө бүхий эрх мэдэл, албан тушаалын байдлаа урвуулан ашиглаж, өөртөө давуу байдал бий болгох гэмт хэрэгт хатгагчаар оролцон үйлдсэн гэм буруутайд тооцож, Эрүүгийн хуулийн 22.1 дүгээр зүйлийн 3 дахь хэсэгт зааснаар ийнхүү шийтгэсэн юм. Дашрамд дурдахад, Г.Солтан нь 2016-2020 онд УИХ-ын гишүүнээр ажиллахдаа өөрөө үүсгэн байгуулсан, захирлаар нь хүү С.Ахмед, менежерээр эхнэр Б.Алтанчимэг нь ажилладаг “Монгол шаазан” ХХК-д малын тэжээл үйлдвэрлэх төслийн зориулалтаар ЖДҮХС-аас урт хугацаатай, хөнгөлөлттэй зээл авахын тулд тухайн үеийн Хүнс, хөдөө аж ахуй, хөнгөн үйлдвэрийн сайд Б.Батзоригт нөлөөлсөн. Төсөл сонгон шалгаруулах хорооны дарга Д.Энхбат, гишүүн С.Төгсбилэг нарт сайдаар нь хэлүүлэн тухайн төслийг шалгаруулах шаардлагатай гэсэн чиглэл өгүүлж, 950 сая төгрөгийн зээл олгох шийдвэр гаргуулсан хэрэгт холбогдоод байсан билээ.