TEAM MONGOLIA: "Токио-2020" олимпын наадмын 21 эрх аваад байна

“Токио-2020” зуны олимпын XXXII наадам хөшигөө нээхэд 100 хоног үлдлээ.

Манай тамирчдын хувьд яг өнөөдрийн байдлаар спортын долоон төрөлд нийт 21 тамирчин (Үүнд 3×3 сагсан бөмбөг эмэгтэй багийн 4 тамирчин багтаж байна) оролцохоор эрхээ аваад байна.

Cпорт сонирхогчдын хувьд удахгүй болох “Токио-2020” олимпын наадам урд өмнөх олимпийн наадмуудаас онцлогтой болно. Учир нь Монгол Улсын спортын түүхэнд манай тамирчид анх удаа багийн төрөлд өрсөлдөх бол ширээний теннисчид 65 жилийн түүхэндээ анх удаа олимпын наадамд оролцох эрхээ халааслаад байгаа. Түүнчлэн манай тамирчид цаашдаа олимпийн эрхийн оноо авах олон улсын хуваарьт тэмцээндүүддээ оролцох ба “Токио-2020” зуны олимпийн наадамд оролцох тамирчдын тоо нэмэгдэх юм.

"Токио-2020" олимпын наадамд оролцох эрхээ авсан спортын төрөл болон тамирчдын талаарх тойм

Буудлагын спортын тамирчдын хувьд олимпын эрхийн оноо авах тэмцээн нь дууссан бөгөөд дөрвөн тамирчнаа Токиод илгээх бол боксын төрөлд эцсийн байдлаар гурван ширэн бээлийтэн олимпод нударга зөрүүлнэ.

Түүнчлэн марафончид одоогоор гурван эрхийг аваад байгаа бол чөлөөт бөхийн тамирчид боломжит 12 эрхээс өнөөдрийн байдлаар долоог нь аваад байна. Тэд ирэх тавдугаар сард Болгарын Софи хотноо олимпийн эрхийн сүүлийн тэмцээн болох дэлхийн тэмцээнээс үлдсэн эрхүүдээ авахаар зорьж буй юм.

Харин усанд сэлэлтийн тамирчдын хувьд эрэгтэй, эмэгтэй тус бүр нэг олимпын эрхийг нэмэх нь тодорхой. Учир нь манай тамирчдаас 2019 оны ДАШТ-д оролцсон эрэгтэй, эмэгтэй тус бүр хоёр, нийт дөрвөн тамирчнаас Олон улсын усанд сэлэлтийн холбоо буюу FINA-гаас олимпод оролцох урилгыг илгээх юм. Ингэснээр 2019 оны ДАШТ-д оролцсон ОУХМ Мягмарын Дэлгэрхүү, Гүнсэнноровын Занданбал, Батбаярын Энххүслэн, Хуягбаатарын Энхзул нарын хэн нь олимпод оролцохыг FINA ирэх сард шийдвэрлэнэ.

Түүнчлэн манай улсаас сүүлийн дөрвөн олимпод дараалан медаль хүртээд байгаа жүдо бөхийн шигшээ баг авч болох 14 олимпын эрхээс 12-ыг нь авах боломжтой. Тэдэнд олимпын өмнө ОХУ-ын Казаньд Гранд Слам, Унгарын Будапештэд ДАШТ-үүд хүлээж байна. Эдгээр тэмцээний дараа Олон улсын жүдо бөхийн холбоо буюу IJF олимпод оролцох боломжтой бөхчүүдийн чансааг эцэслэн гаргах бөгөөд ингэснээр тухайн улс аль жинд ямар тамирчнаа оролцуулахаа шийдвэрлэнэ.

Мөн энэ цаг мөчид хүндийг өргөлт, тэквондогийн тамирчид тивийн аварга шалгаруулах тэмцээндээ оролцохоор хилийн чинадыг зориод байна.

Хүндийг өргөлтийнхөн Узбекистаны Ташкент хотноо очоод байгаа бол тэквондочид Кыргызстаны Бишкект хамтарсан бэлтгэлээ базаагаад Йорданы Аманд олимпийн эрхийн тэмцээндээ оролцоно.

Харин 3х3 сагсан бөмбөгийн эрэгтэй шигшээ баг Австри, Унгарт олимпын эрхийн тэмцээнд оролцоно. Тэд Хангайт дахь олимп баазад олимпод оролцох эмэгтэй багийн хамт бэлтгэлээ базааж байна. Сонирхуулахад, түүхэндээ багийн төрлөөр анхлан олимпын эрх авсан эмэгтэй шигшээ баг долоон тамирчинтайгаар бэлтгэлээ базааж байгаа бөгөөд үүнээс дөрвөн тамирчин нь Токиог зорих юм.

"Токио-2020" зуны олимпын XXXII наадамд оролцохоор эрх аваад байгаа тамирчдаа танилцуулъя.

ЧӨЛӨӨТ БӨХ

Эрэгтэй

1. Т.Тулга (65 кг)

2. М.Лхагвагэрэл (125 кг)

Эмэгтэй

3. Ц.Намуунцэцэг (50 кг)

4. Б.Болотуяа (53 кг)

5. Б.Хонгорзул (57 кг)

6. С.Батцэцэг (68 кг)

7. О.Бурмаа (76 кг)

БОКС

Эрэгтэй

8. Э.Цэндбаатар (57 кг)

9. Б.Чинзориг (63 кг)

Эмэгтэй

10. Н.Мягмаржаргал (68 кг)

БАЙТ ХАРВАА

11. Б.Отгонболд

БУУДЛАГА

Эрэгтэй

12. Э.Даваахүү (Гар буу)

Эмэгтэй

13. О.Гүндэгмаа (Гар буу)

14. Ц.Анударь (Гар буу)

15. О.Есүгэн (Урт буу)

ШИРЭЭНИЙ ТЕННИС

Эрэгтэй

16. Э.Лхагвасүрэн

Эмэгтэй

17. Б. Болор-Эрдэнэ

ХӨНГӨН АТЛЕТИК

Эрэгтэй

18. Б.Сэр-Од

19. Б.Бямбажав

Эмэгтэй

20. Б.Мөнхзаяа

САГСАН БӨМБӨГ

21. 3×3 сагсан бөмбөг эмэгтэй баг (4 тамирчин)

Эх сурвалж: МҮОХ