Т.Чимгээ, Б.Содномдаржаа нарыг СУЛЛАХ ЭСЭХИЙГ Дээд шүүх шийднэ

Тагнуулын ерөнхий газрын дарга асан Б.Хурц, Улсын ерөнхий прокурорын орлогч асан Г.Эрдэнэбат нарын есөн хүнийг гурван шатны шүүхээс гэм буруутай гэж үзсэн.

Тэднийг 2021 оны гуравдугаар сарын 31-ний өдөр шүүж, төр, нийгмийн зүтгэлтэн С.Зоригийг хөнөөсөн хэргээр ял сонссон Б.Содномдаржаа, Т.Чимгээ нарыг эрүүдэн шүүж, хэрэг тулгасан гэж үзэн, тус бүр нэг жилийн хорих ял оноосон байдаг. Ийнхүү Б.Хурц нарыг гэм буруутай гэж үзсэн учраас хилсээр ял сонссон гэгдэж буй ялтнуудыг суллахыг тэдний ар гэрийнхэн шаардаж байгаа юм. Тэгвэл ирэх тавдугаар сард Т.Чимгээ, Б.Содномдаржаа нар батлан даалтад гарч болзошгүй байна.

Учир нь Улсын ерөнхий прокурорын газраас шинээр илэрсэн нөхцөл байдлын улмаас Т.Чимгээ, Б.Содномдаржаа нарт ял оноосон шүүхийн шийдвэрийг хүчингүй болгох тухай Прокурорын дүгнэлт үйлдэж, хяналтын шатны шүүхэд хүргүүлжээ.

Энэ дүгнэлтийг Улсын дээд шүүх өнгөрсөн долоо хоногт хүлээж авсан байна.

Шүүхийн шийдвэрээс хамаарч Т.Чимгээ, Б.Содномдаржаа нар батлан даалтаар суллагдах эсэх нь тодорхой болох бөгөөд одоогоор уг асуудлыг хэлэлцэх, шүүх хурлын тов хараахан гараагүй байна.