Хууль сахиулах бүх бие бүрэлдэхүүнд сургалт хийхийг Монгол Улсад уриаллаа

Хүчээр сураггүй алга болгохын эсрэг НҮБ-ын хороо Монгол Улсын талаарх үр дүнг танилцуулсныг өнөөдөр /2021.05.12/ Монгол Улс дахь НҮБ-аас мэдээллээ.

Тус хороо нь Монгол Улсын зүгээс дотоодын хууль тогтоомждоо хүчээр сураггүй алга болгох үйлдлийг гэмт хэрэгт тооцох, гэрч, хохирогчийг хамгаалах, эрүүдэн шүүхээс урьдчилан сэргийлэх механизм байгуулах арга хэмжээ авсныг сайшаалаа.

Хороо тухай улсад хүчээр сураггүй алга болгох үйлдлийг гагцхүү хууль бусаар баривчилсан тохиолдолд хэмээн явцуу тодорхойлсон явцыг анхаарч үзжээ.

Үүнтэй уялдан уг хороо Монгол Улсад “хүчээр сураггүй алга болгох” гэсэн тодорхойлолтыг конвенцтой нийцүүлж, хууль тогтоомждоо зайлшгүй өөрчлөлт хийх шаардлагатай талаар зөвлөв. Мөн цэрэг, иргэн, төрийн алба, шүүгч, прокурор зэрэг бусдын эрх чөлөөг хязгаарлах, баривчлах, саатуулахад оролцдог аливаа этгээд - хууль сахиулах, аюулгүй байдал, тусгай албадын бүх бие бүрэлдэхүүнд конвенцын зүйл заалтын талаар тусгай сургалт зохион байгуулахыг Монгол Улсад уриалсан байна.

Дээр дурдсан үр дүнгийн талаар буюу албан ёсоор Дүгнэлт зөвлөмж гэх тайланг хорооны хурлын цахим сурвалжаас үзэх боломжтой.