Л.Оюун-Эрдэнэ: Netflix-д таваас доошгүй монгол контент байршуулна

Тэрбээр түүх, соёл, зан заншил, өв уламжлал, ахуй амьдрал зэргийг харуулсан соёлын аливаа бүтээлийг гадаад зах зээлд гарахад нь хууль эрх зүйн таатай орчин, татварын бодлого гээд бүх талаар дэмжихээ илэрхийллээ. Үүний төлөө бүтээлч, уламжлалтай, уялдаа холбоотой, нэг стратеги барьж хамтран ажиллахыг уриалав. Ингэснээр соёлын бүтээлч үйлдвэрлэл уул уурхайгаас дутахгүй орлого олох боломжтойг тэмдэглэв.

Ерөнхий сайд
 

• 2024 он хүртэл Холливудын нэг киног Монголдоо хийлгэхээр холбогдох яамд, төрийн байгууллага, хувийн хэвшил одооноос хариуцсан чиглэлээрээ ажиллаж эхлэх, улсын төсөвт эхний шатны хөрөнгийг тусгах,
   
• Netflix-д таваас доошгүй монгол контент байршуулах,
   
• “Наадам” гэсэн цогц бүтээл хийж, улсаа сурталчилах зорилт дэвшүүлэв. Эдгээртэй холбоотой хууль, эрх зүйн орчинг сайжруулах, зураг төсөл гаргах, гадаад талаас тавих стандарт шаардлагыг нь хангах, гадаад сурталчилгаа, маркетинг зэрэгт дэмжлэг үзүүлэхээ хэлэв.

Соёлын сайд Ч.Номин соёлын бүтээлч үйлдвэрлэлийн салбарын суурь судалгаа, статистик, тоон мэдээлэл, энэ салбарыг хөгжүүлэх үндэсний бодлогын талаар товч мэдээлэл өгөв.

Уулзалтад дүрслэх урлаг, хувцас загвар, дижитал дизайн, дуу хөгжим, кино урлагийн салбарын төлөөлөл өнөөгийн байдал, тулгамдаж байгаа асуудлаа танилцууллаа.

Б.Гантуяа, Монголын орчин үеийн урлагийг дэмжих холбоог үүсгэн байгуулагч (Дүрслэх урлаг)
 

• Чөлөөт уран бүтээлчдийн Нийгмийн даатгалыг төр хариуцах
• Олон улсын үзэсгэлэнд оролцох, урлан, бүтээл туурвих зэрэгт зориулсан тэтгэлэгт хөтөлбөр хэрэгжүүлэх
• Дэлхийн олимп гэгдэх Венецийн Биеннальд тогтмол оролцуулах
• Дүрслэх урлагийн сургуулийн сургалтын хөтөлбөр, заах арга зүй, байрыг стандартад нийцүүлэх

Ч.Мөнхжаргал, “Michel & Amazonka” ХХК-ийн Гүйцэтгэх захирал (Хувцас загвар)
 

• Менежер, зохион бүтээгч, нэхмэл сүлжмэлийн тооцоологч зэрэг нарийн мэргэжлээр сургах, суралцахад дэмжлэг үзүүлэх
• Түүхий эд материал, бөс бараа, тоног төхөөрөмжийг гааль, НӨАТ-аас чөлөөлөх
• Төв Азийн загварын долоо хоногийг дотоодод тогтмол зохион байгуулах, олон улсын арга хэмжээнд оролцоход дэмжих
• Энэ салбарыг кластер хэлбэрээр хөгжүүлэх
• Гадаад худалдаа, экспорт хийхэд дэмжих
   

Г.Анхныбаяр, “Beer night” студийн найруулагч, аниматор (Дижитал тоглоом)
 

• Давхар татварын гэрээгүй байдаг нь олон улсаас орлого олдог аж ахуйн нэгжид дарамт болдогт анхаарах
• Хязгаарлагдмал нөөцөө бус оюуны бүтээлээ экспортлоё

Ц.Нацагдорж, “Playtime festival” санаачлагч, захирал (Дуу хөгжим)
 

• Дэлхийн хөгжмийн топ наадмуудын зохион байгуулагч зэрэг нөлөөтэй хүмүүсийг авчирч хамтлаг, дуучдаа дэлхийд танилцуулах
• Чадварт хөрөнгө оруулах
• Хөгжим хэрэглэгчдийг соён гэгээрүүлэх, зохиогчийн эрхийн чиглэлээр шүүгчдийг сургах зэргээр хамтын удирдлагын байгууллагын чадавхи, ажлыг нь дэмжих
• Гадаадын уран бүтээлчдэд олгож байгаа 20 хувийн татварыг хоёр хувь болгох, хөгжмийн тоног төхөөрөмжийн гаалийн татварыг хөнгөлж, уран бүтээлчдийн НӨАТ-ыг бууруулах
• Playtime наадмыг 2025 он гэхэд 100 мянган үзэгчтэй Азийн топ-5 наадмын нэг болгох

Х.Эрдэнэбаяр. “М plus” ХХК-ийн үүсгэн байгуулагч (Дуу хөгжим)
 

• Дижитал медиа хөгжүүлэх чиглэлээр үйл ажиллагаа явуулдаг. Тухайлбал 470 гаруй мянган хэрэглэгчтэй цахим болон аудио ном, хөгжим бүхий аппликэйшн нэвтрүүлсэн. Хамтран ажиллахад бэлэн.

Ц.Ариунаа, “Гуру медиа” ХХК-ийн продюсер (Кино урлаг)
 

• Хууль, эрх зүйн орчин бүрдүүлэх
• Дэлхийд өрсөлдөх бүтээл туурвихад дэмжлэг үзүүлэх
• Найруулагч, зураглаач, дууны найруулагч зэрэг нэн эрэлттэй мэргэжлээр гадаадад сургах, олон улсын кино наадамд оролцох, сургалтын тэтгэлэг олгох
• Кино студи, продакшныг НӨАТ-аас чөлөөлөх, энэ салбарт хөрөнгө оруулсан аж ахуйн нэгжийн дэмжлэгийг татвараас хасагдах зардалд тооцох зэрэг хүсэлт тавилаа.
   

Түүнчлэн “Хү” хамтлагийн продюсер Д.Дашдондог сайн хамтлагийг дэлхийд гарахад сайн баг ард нь ажилладаг жишгийг нэвтрүүлэх, Ерөнхий сайдын дэргэдэх соёл, урлагийн зөвлөлийн гишүүн, архитектор Б.Батжав соёлжсон орчин бүрдүүлэх, түүх өгүүлсэн барилга, байгууламжаа авч үлдэхэд анхаарах хэрэгтэйг хэллээ.

Хөгжмийн зохиолч, продюсер Б.Наранзун соёлын өвөө хадгалах, хамгаалах, өвлүүлэх, суурь баазаа бүрдүүлэх, хүнээ хөгжүүлэх хөрөнгө оруулалт хийх, “Циркус Монголиа Хадгаа” циркийн захирал Ч.Хатанбаатар циркийн жүжигчин, сайн багш бэлтгэхэд дэмжлэг үзүүлэхийг хүсэв. Сангийн сайд Б.Жавхлан татвар, гааль, НӨАТ-аас чөлөөлөх, хөнгөлөх талаар тодруулга өгч тодорхой саналуудыг судалж үзэхээ илэрхийлэв.

Монгол Улсын Ерөнхий сайд Л.Оюун-Эрдэнэ мөн соёлын өвийн бүтээл, тэдгээрийн бүртгэл, хадгалалт, хамгаалалт, сэргээн засах ажлын явцтай танилцлаа. Салбарынхан зориулалтын байртай болсноор бүтээлүүдээ хадгалах, сэргээн засах зэргээр хэвийн ажиллах боломж бүрдсэн байна.

Соёлын бүтээлч үйлдвэрлэлийн салбарт 3,400 орчим аж ахуйн нэгж үйл ажиллагаа явуулдаг. Соёлын яам “Монгол соёл-Монголын баялаг” арга хэмжээний хүрээнд Соёлын бүтээлч үйлдвэрлэлийн цогцолбор байгуулахаар төлөвлөжээ.