Эрэн сурвалжлагдаж байсан Г.Ган-Очирыг баривчилжээ

Цагдаагийн байгууллагаас МАН-ынхан 2020 оны сонгуулийн үр дүнг хууль бусаар авсан хэмээн олон нийтэд мэдэгдсэн Г.Ган-Очир гэх залууг эрэн сурвалжилж байгаа талаар өмнө нь мэдээлсэн билээ. Үүнтэй холбогдуулан өчигдөр /2021.06.04/ ЦЕГ-ын Хэвлэл мэдээллийн төвийн дарга, хурандаа Б.Баатархүү "Мэдээллийн хэрэгслээр гэмт хэргийн шинжтэй гарсан зүйлийг цагдаагийн байгууллага шалгадаг. Сонгуулийн хар машины талаар ярьсан тухайн иргэнийг эрэн сурвалжилж байгаа. Тэр хүн гэмт хэргийн шинжтэй зүйлийг ярьсан. Гэтэл зугтаагаад алга болчихсон. Цагдаагийн байгууллагаас ярьсан зүйлийнх нь талаар шалгах гэхээр зугтаагаад алга болчихсон. Тухайн иргэн нь худал мэдээлэл тараасан, бусдыг залилсан байж болзошгүй" гэх тайлбарыг өгсөн. 

Тэгвэл эрэн сурвалжлагдаж байсан иргэн Г.Ган-Очирыг өнгөрсөн шөнө баривчилжээ. Энэ талаар ЦЕГ-ын албан ёсны цахим хуудаснаа нийтэлсэн байна.  

Учир нь, иргэн Г.Ган-Очир "Миний бие сонгуулийг хууль бусаар авах гэсэн гэмт хэргийн хохирогч болсон. Цагдаа, тагнуулын байгууллагаар зургаан сар шалгуулсан. Өнгөрсөн 2020 оны орон нутгийн сонгуулийн үеэр үйлдэгдсэн хэдий ч УИХ-ын сонгуулиас улбаатай. Намын болон төрийн хүмүүс иргэдийн саналыг хууль бусаар өөрчилж байгаа. Монгол Улсын хууль хэргийн гэрч болох надад сэтгэлзүйн дарамт үзүүлсэн. Сонгуулийн хар машины программын хугацаа 2018 онд дууссаны дараагаар МАН-ын удирдах албан тушаалтан ямар ч нууцлалгүй болгосон. МАН сонгуулийн хар машинаар сонгогчийн саналыг луйвардаж, хууль бус аргаар төрийн эрхийг авсан. Төрийн хэргийг хууль бусаар авах гэсэн хэрэг дээр тагнуулын байгууллага надыг шалгасан. Надаас гурав хоног байцаалт авсан. Сонгуулийн хар машиныг программчлаад, хакердаад 175 тэрбум төгрөг шилжүүлсэнийг утсан дээрээ харуулсан. Дараагаар нь хохирогчгүй хэрэг гэж хэргийг хаасан байсан” хэмээн ярьсан байдаг.