С.Эрдэнэ: Х.Баттулгын нөлөөнд байдаг гишүүд Д.Ганбатыг огцруулах гэлээ

Улсын дээд шүүхэд Ардчилсан нам (АН)-ын даргаар бүртгэлтэй С.Эрдэнэ намын байрандаа мэдээлэл хийлээ. 

Тэрбээр "АН-ын бүлэгт Х.Баттулгын шууд нөлөөнд байдаг зарим нэг гишүүд Засгийн газарт хариуцлага тооцохоор гарын үсэг зурсан гишүүдийг бүлгээс шахан зайлуулах, бүлгийн аль нэг албан тушаалыг булааж авах гэх мэт үйл ажиллагаа явуулж эхэлсэн байна. Эрх барьж байгаа намд хариуцлага тооцох ажлыг гардан зохион байгуулж байсан Д.Ганбатын огцруулах, бүлгээс сонгогдсон зарим нэг улс төрийн албан тушаалтныг солих гэх мэт үйл явц маш хүчтэй өрнөж байна.

Тиймээс АН-ын Үндсэн дүрмийн хүрээнд үйл ажиллагаа явуулж байгаа гишүүдээ бид хамгаална. Монгол Улсын Ерөнхийлөгчөөр АН-аас сонгогдон ажиллаж байсан хүний урт гар өнөөдрийг хүртэл бүлгээс салаагүй байна. АН-ын хоёр дахь бүлгийг тараах үйл ажиллагаа явуулж байгаад намын даргын хувьд харамсаж байна. 

Хоёрдугаарт, шүүгч Х.Сонинбаяр эрх мэдэл, албан тушаалаа урвуулан ашиглаж, Ц.Тувааныг АН-ын даргын үүрэг гүйцэтгэгч мэтээр цахим мэдээллийн сайтад бүртгүүлсэн үйлдэл нь өөрөө хууль зөрчсөн үйлдэл байсан байна гэдгийг тогтоогоод, Х.Сонинбаярт хариуцлага тооцсон. Өөрөөр хэлбэл, хуучин Ерөнхийлөгчийн заавраар АН-ыг хагалган бутаргасан Ц.Тувааны үйлдэл хүчингүй гэсэн үг. Одоо бол хууль ёсны АН, хууль ёсны даргатайгаар үйл ажиллагаагаа явуулна. Бид дараагийн даргаа сонгож, Улсын Дээд шүүхэд бүртгүүлэх ажлаа хийнэ. Одоо тамгатай, тамгагүйн тухай асуудал яригдахгүй. Шүүгч Х.Сонинбаяр гэгч эрх мэдлээ урвуулан ашиглаж, Ц.Тувааныг цахим бүртгэлд бүртгэснээр АН-ыг маш том хагаралд хүргэсэн. 

Гуравдугаарт, хүний эрх, дарангуйлал дарамттай холбоотой асуудлаар АН өөрийн байр суурийг хатуу илэрхийлэх болно" гэж мэдэгдлээ.