"Камертон"-ы тоглолтыг хийсэн “Собт трейд”-ийн ТУСГАЙ ЗӨВШӨӨРЛИЙГ цуцаллаа

2021 оны 10 сарын 19

Хан-Уул дүүргийн 11 дүгээр хорооны "Зайсан Хилл" цогцолборт энэ сарын 15-нд "Камертон" хамтлагийн тоглолт болсон.

Тоглолтын үеэр заалны дүүргэлтийг 50 хувиас хэтрүүлж, халдвар хамгааллын дэглэм зөрчсөн юм. Түүнчлэн “Собт трейд” ХХК нь Улаанбаатар хотын Захирагчийн ажлын албатай “Хариуцлагын гэрээ” байгуулаагүй, түр журам, тусгай нөхцөл шаардлагуудыг удаа дараа зөрчсөн, наймдугаар сараас хойш гурван удаагийн зөрчлийн хэрэгт бүртгэгдсэн. Мөн “Зайсан хилл” цогцолборт наймдугаар сараас хойш 10 орчим зөрчил гарсан талаар холбогдох албаныхан мэдээлсэн билээ.

Мэргэжлийн байгууллагын зүгээс зөвлөн туслах, зөрчил арилгуулах болон торгуулийн арга хэмжээ авсан хэдий ч цар тахлын дэглэм зөрчиж, удаа дараа халдварын эрсдэлтэй нөхцөл байдал үүсгэсэн тул Хан-Уул дүүргийн Мэргэжлийн хяналтын хэлтсээс тус байгууллагын тусгай зөвшөөрлийг цуцлах санал гаргасан. Харин НМХГ-аас тусгай зөвшөөрлийг түдгэлзүүлэх саналыг Нийслэлийн Захирагчийн ажлын албанд ирүүлжээ. Холбогдох байгууллагуудын саналыг Улаанбаатар хотын Ерөнхий менежерийн зөвлөлийн хурлаар хэлэлцээд, "СОБТ трейд" ХХК-ийн тусгай зөвшөөрлийг цуцлах шийдвэр гаргалаа гэж НЗДТГ-ын хэвлэл мэдээлэлтэй харилцах хэлтсээс мэдээллээ.

 

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top