"ХИРТЭЭГҮЙ САРНАЙ" кино нээж, БҮХ КИНО ТЕАТРААР гарч эхэллээ

"Хас фильм" студийн 14 дэх уран бүтээл "Хиртээгүй сарнай" УСК нээлтээ хийж, хайр дурлалын гашуун романсыг харуулсан дэлгэцийн шинэ уран бүтээл "мэндэллээ". 

Киноны нээлтийн үйл ажиллагаа өчигдөр /2021.11.19/ боллоо. Шинэхэн уран бүтээлээ өлгийдөн авсан уран бүтээлчид бүтэн жилийн хөдөлмөрөө үзэгчдийн хүртээл болгох гэж буйдаа сэтгэл догдолж байгаа нь улаан хивсэн дээр алхаж байхад нь тодхон харагдаж байв.

Киноны нээлтийн үеэр соёлын яамны төлөөлөл ирж, зарим уран бүтээлчдийн хөдөлмөр, хичээл зүтгэлийг үнэлж, соёлын тэргүүний ажилтан болон соёлын яамны жуух бичгээр шагналаа.

Тухайлбал, “Хиртээгүй сарнай” УСК-ны гол дүрийг бүтээсэн залуу жүжигчин О.Амгаланбаатар соёлын тэргүүний ажилтан цол тэмдгээр шагнуулж, энгэрээ мялаасан юм.

Киноны нээлтийн үеэр зарим уран бүтээлчдийн баярын сэтгэгдлийг сонслоо.

ЭНЭ УДААГИЙН УРАН БҮТЭЭЛЭЭ ЗАЛУУЧУУДАД ХАЯГЛАЖ ХИЙЛЭЭ

“Хиртээгүй сарнай” киноны зохиолч, найруулагч Ц.Хүсэлбаатар:

Өнгөрсөн аравдугаар сараас зохиол руугаа орж, нэлээд удаан хугацаанд ажилласан. Ингээд гуравдугаар сарын 12-нд зургандаа гарсан юм. Зураг авалт дөнгөж эхлээд буюу гуравдугаар сарын 20-ны үеэр кино багаараа ковид-19 туссан. Азаар бүгд эрүүл энх байна.

Уран бүтээл бүр өөрийн гэсэн илэрхийлэх санаатай байдаг. Киногоор дамжуулан үзэгчид жижиг зүйлийг ч гэсэн ухаараасай гэж бүтээдэг. Энэ удаагийн уран бүтээлээ залуучуудад хаяглаж хийсэн.

Би яагаад ч юм 12-ын тоонд их дуртай. Ер нь Монголчууд 12-ын тоог их бэлгэддэг шүү дээ. “Хиртээгүй сарнай” кино бол миний бие дааж, өөрөө зохиолоо бичиж, найруулсан 12 дахь уран бүтээл. Энэ удаагийн бүтээлээ охиндоо зориулж хийсэн.

СЭРГЭЛЭН ЗАНГАА БУРУУ АШИГЛАВАЛ ЯМАР МУУ ҮР ДАГАВАР ГАРЧ БОЛОХЫГ КИНОГООРОО ХАРУУЛАХЫГ ЗОРЬСОН

Соёлын тэргүүний ажилтан, “Хиртээгүй сарнай” киноны гол дүрийн жүжигчин О.Амгаланбаатар:

Өөрөө мэдээгүй байхдаа гэнэт соёлын тэргүүний ажилтан гэх шагнал авлаа. Маш их баяртай байна. Киноны баг хамт олон, найз нөхөд, гэр бүлийнхэн болон үзэгчдэдээ маш их баярлалаа.

Киноны дүрийн хувьд сэргэлэн зангаа буруу ашиглавал ямар муу үр дагавар гарч болдог гэдгийг залуучуудад ойлгуулахыг зорьсон, сургамжтай кино болсон.

ААВЫНХАА НАЙРУУЛСАН УРАН БҮТЭЭЛД ЭЭЖ, ДҮҮТЭЙГЭЭ ХАМТ ТОГЛОСОНД БАЯРТАЙ БАЙНА

“Хиртээгүй сарнай” киноны гол дүрийн жүжигчин Х.Баярмаа:

Киноны маань нээлтийн үеэр огт төсөөлөөгүй үйл явдлууд боллоо. Кино багийн хамт олон маань соёлын тэргүүний ажилтан, соёлын яамны жуух бичгээр шагнууллаа. Бүтэн жилийнхээ уран бүтээлийг үзэгчдэдээ үзүүлэх гэж байгаад туйлын их баяртай байна.

Мөн аавынхаа найруулсан уран бүтээлд ээж болон дүүтэйгээ хамт тоглох ховорхон завшаан тохиолоо.

АШУҮИС-ИЙГ ОРХИЖ, ХҮСЭЛ СОНИРХЛОО ДАГААД ЖҮЖИГЧИН БОЛОХООР ШИЙДСЭН

Найруулагч Ц.Хүсэлбаатарын бага хүү, залуу жүжигчин Х.Сумъяадорж:

Энэ бол миний тоглосон анхны кино. Тийм болохоор маш их сандарч, догдолж байна. Сайн тоглохыг хичээж, бэлтгэлээ сайн хийсэн. Сайхан уран бүтээл болсон гэж бодож байна.

Анх кинонд тоглоно гэдгээ сонсоод маш их гайхсан. Кинонд тоглоно гэдэгт итгээгүй.

АШУҮИС-д суралцаж байгаад сургуулиасаа гараад СУИС-д орсон. Одоо гуравдугаар курст суралцаж байна. Ийм шийдвэр гаргахад мэдээж гэр бүл маань нөлөөлсөн.

Би анхнаасаа урлагаар хүн болно гэж боддог байсан. Хүсэл, сонирхлоо дагаж, анагаахыг орхиод жүжигчин болохоор шийдсэн.

"Хиртээгүй сарнай" УСК-ны нээлтийн үйл ажиллагаанаас зураглаачийн дуранд буусан ОНЦЛОХ зургуудыг хүргэж байна.