Дөрвөн жилийн ял сонссон Э.Бат-Үүл ДАВЖ ЗААЛДАХАА мэдэгдлээ

Шүүхээс өнөөдөр /2021.12.16/ Хотын дарга асан Э.Бат-Үүл нарыг гэм буруутайд тооцож, дөрвөн жилийн хорих ял оноох шийдвэрийг гаргалаа. Харин түүний хүү Б.Чулуудайд холбогдох хэргийг хэрэгсэхгүй болгож, 15 сая төгрөгөөр торгох шийдвэрийг гаргасан байна.

Тэгвэл шүүхээс дөрвөн жилийн хорих ял сонссон Хотын дарга асан Э.Бат-Үүлийг хорих анги руу ачсан бол түүний хүү Б.Чулуудай олон нийтэд хандаж мэдээлэл хийсэн юм.

Тэрбээр "Өнөөдөр аавыг минь хилс хэрэгт гүтгэлээ. Хийгээгүй, огт оролцоогүй хэргийнх нь төлөө, өөрөө ч мэдээгүй байсан хэргийн төлөө Улаанбаатар хот, нийслэлийн удирдлагууд нэхэмжлэл гаргасны дагуу хохирол төлүүлнэ, дөрвөн жилээр ял өгнө гэж яллачихлаа. Бид хоёр анх цуг ялласан. Гэхдээ шүүх миний хэргийг хэрэгсэхгүй болголоо. Би гэхдээ аавынхаа төлөө тэмцэнэ. Үнэхээр шударга бус байна" гэв.

Түүнчлэн "Хэргийн хөөн хэлэлцэх хугацаа 2018 онд дууссан. Яг үнэндээ энэ хэргийг мэдээгүй байсан. Шүүх өөрийнхөө хэмжээнд ял оноолоо. Гэхдээ энэ бол шударга бус, бид тэмцэх болно. Бид давж заалдана" хэмээн ярилаа.

Харин Хотын дарга асан Э.Бат-Үүл хүүгээрээ дамжуулж, олон нийтэд үг дайсан байна. Тэрбээр "Хэрэг, хохирол хоёрыг над дээр зохиолоо. Шударга ёсны төлөө тэмцэнэ. Шүүхийн хараат байдлын төлөө тэмцэнэ. Гэр хорооллынхоо төлөө тэмцэнэ. Би улс төрийн тэмцэл хийж байх хугацаандаа хэнийг ч гутаан доромжилж байгаагүй. Монголын ардчилалын төлөө тэмцэнэ" гэжээ.