Ерөнхийлөгч У.Хүрэлсүх Дэлхийн аварга М.Анхцэцэгт БАЯР ХҮРГЭЛЭЭ

Манай сурвалжлагч Москва хотоос мэдээлж байна.

ОХУ-д албан ёсны айлчлал хийж буй Монгол Улсын Ерөнхийлөгч Ухнаагийн Хүрэлсүх хүндийг өргөлтийн насанд хүрэгчдийн Дэлхийн аварга шалгаруулах тэмцээнд өндөр амжилт үзүүлж, алтан медаль хүртсэн шинэхэн Дэлхийн аварга "Эрхэт Монгол" группийн тамирчин Мөнхжанцангийн Анхцэцэгтэй утсаар холбогдож, Гавьяат тамирчин М.Анхцэцэг болон түүний дасгалжуулагч Ц.Хосбаяр нарт Токиогийн олимпын наадам, үргэлжлүүлээд Дэлхийн аварга шалгаруулах тэмцээнд амжилттай оролцон, Монголын хүндийг өргөлтийн спортын түүхэн дэх анхны Дэлхийн аварга тамирчин болж, их спортын арвин түүхэнд тэмдэглэгдэх амжилт үзүүлсэнд баяр хүргэлээ. 

Ерөнхийлөгч "М.Анхцэцэгтээ баяр хүргэе. Монголынхоо ард түмнийг баярлуулж, бахархуулж чадлаа. Монголынхоо нийт ард түмний өмнөөс баяр хүргэе. Багш, дасгалжуулагч, хамт яваа тамирчин, хүндийг өргөлтийн спортын хамт олонд нь баяр хүргэе. Эх орондоо сайн яваад хүрээрэй. Би ОХУ-д албан ёсны айлчлалаар явж байгаа юм. Айлчлал амжилттай болж өндөрлөөд, Монголынхоо Элчин сайдын яаман дээр ирээд байна. Ажлын айлчлалын бүрэлдэхүүнд яваа бүх хүмүүс маань мөн тамирчин, дасгалжуулагч хоёртоо баяр хүргэж байна. Амжилтаа ахиулж, олимпын аварга болохыг ерөөе. Монгол эмэгтэй хүний гайхалтай тэсвэр, тэвчээрийг дэлхийд харуулж чадсан охиноороо Монголын ард түмэн бахархаж байна" хэмээлээ. 
 

ДЭЛХИЙН АВАРГА М.АНХЦЭЦЭГИЙН АМЖИЛТУУД
 

• Залуучуудын ААШТ-ий хошой алт
• Залуучуудын ДАШТ-ий алт
• Насанд хүрэгчдийн ААШТ-ий алт
• Азийн танхимын болон тулааны спортын наадмын алт
• Дэлхийн цомын тэмцээний алт
• Оюутны ДАШТ-ий алт
• Насанд хүрэгчдийн ДАШТ-ий хүрэл (2017)
• Насанд хүрэгчдийн ДАШТ-ий хүрэл (2019)
• Насанд хүрэгчдийн ДАШТ-ий мөнгө (2021)
• Насанд хүрэгчдийн ДАШТ-ий мөнгө (2021)
• Насанд хүрэгчдийн ДАШТ-ий алт (2021)
• Рио-2016 олимп, 8-р байр
• Токио-2020 олимп, 4-р байр