Chakaland хамтлаг: Монгол дуучдыг Японд таниулахыг хүсэж байна

Залуусын анхаарлыг татаад буй "Монгол цуйван хэр вэ" дууг дуулсан, Японы Chakaland хамтлагийн залуустай Монголд ирээд байхад нь уулзаж ярилцлаа. Ийнхүү монгол хэл дээр уран бүтээлээ гаргаад буй Chakaland хамтлагийнхан уг дууг хэрхэн бүтсэн тухай түүхээ хуваалцсан юм.

-Та юуны өмнө манай уншигчдад хамтлагийн гишүүдийн талаар танилцуулахгүй юу? 

Хамтлагийн ахлагч Чакатомо:

-Хамтлаг байгуулагдаад жил гаруй хугацаа өнгөрчээ. Манай хамтлаг уран бүтээл туурвихын зэрэгцээ Японы Окинава хотод телевизийн нэвтрүүлэг хийдэг байсан. Цэвэр мэдрэмждээ тулгуурлан гэгээлэг дуунууд гаргахыг зорьдог бөгөөд дууны ая, үг, клип, зураг авалтыг өөрсдөө хийдгээрээ онцлогтой. Тухайлбал, хамтлагийн ахлагч миний бие реппер, хоолой болон багийн продюсерын үүрэг гүйцэтгэдэг бол хамтлагийн гишүүн Хао Блосом маань хоолой, трек үйлдвэрлэгч, харин Г.Энх-Эрдэнэ хөгжимчин, хөгжмийн инженерийн үүрэг гүйцэтгэдэг.

-Хамтлагийн гишүүн Г.Энх-Эрдэнэ ямар шалтгаанаар хамт ирж чадаагүй вэ?

-Г.Энх-Эрдэнэ Японд байх хугацаандаа хамтлагтаа уран бүтээлээ гаргахаас гадна өөр ажил хийдэг байсан. Тэр ажлаасаа чөлөө авах боломжгүй байсан болохоор энэ удаад ирж чадаагүй. Гэхдээ бид дахин бүрэн бүрэлдэхүүнээрээ зун ирэх төлөвлөгөөтэй байгаа. Тэр үед Г.Энх-Эрдэнэ маань хамт ирнэ.

-Монгол цуйван идэж үзсэн үү. Таны төсөөлж байснаар ямар амттай байсан бэ?

-Миний төсөөлж байснаас ч илүү гоё амттай санагдсан. Монголд байх хугацаандаа нэг өдөр өнжөөд байнга иддэг болсон. Бас цуйван дээр сүүтэй цай хийж идэж үзсэн үнэхээр гоё амттай байсан шүү. /инээв/

-Японд монгол цуйван идэж үзсэн үү. Нутагт нь ирээд цуйван идэх хоёр хэр өөр амттай санагдсан бэ? 

-Японы Токио хотод Улаанбаатар гэдэг хоолны газар цуйван идэж үзсэн. Гэхдээ Монголд ирээд цуйван идэхэд Монголд идсэн цуйван нь их амттай байсан.

-Өнгөрсөн сард болсон “Япон фестиваль Монголд” тоглолтыг Монголчууд хэр хүлээж авсан бэ?

-Манай тоглолтод ирсэн хүмүүсээс япон хэл мэддэг хүн олон байсан болохоор хамтдаа хөгжилдөөд, японоор яриад цагийг их зугаатай сайхан өнгөрөөсөн. Тоглолтод ирсэн хүмүүс ч их таатай хүлээн авсанд бид бүхэн их таатай байгаа.

-Япон хамтлаг монголоор дуулсан нь их сонирхолтой санагдаж байна. Яагаад монголоор дуулах болсон бэ?

-Манай хамтлаг өмнө нь “Рамен” гэдэг нэртэй дуу хийх гэж байсан. Гэвч манай хамтлагийн монгол гишүүн японы раменаас өөр гадаад улсын дуу хийж үзье гэж санал гаргасан юм. Г.Энх-Эрдэнэ раменаас ч илүү амттай, хүмүүс их иддэг монгол цуйван байдаг тэрийг дуулъя гэж хэлж байсан. Энэ санал нь бидэнд их таалагдсан.

-Монголын цаг агаар эрс тэс уур амьсгалтай байдаг. Та бүхэнд ямар санагдсан бэ?

Хамтлагийн гишүүн Хао Блосом:

-Бид Дархан хот руу явахад их хол санагдаж байсан. Тэнд Улаанбаатар хотод үзээгүй байгалийн сайхан үзэсгэлэнт газруудыг харж, цаг агаарын хувьд ч гэсэн их сайхан санагдсан. Дарханд байгалийн сайхан газруудад зураг авалт хийсэн. Замдаа малчин айлуудаар зочлоход бидний төсөөлж байснаас их өөр амьдралтай санагдсан. Гэртээ сүлжээтэй, зурагттай,  интернэттэй байсан. Би үнэхээр ийм гэж төсөөлөөгүй. Ялангуяа Монголын хөдөө талд ямар ч сүлжээгүй айлууд амьдардаг байх гэж бодож байсан минь алдаа байсан. /инээв/

-Монголд байх хугацаандаа морь унаж үзсэн үү. Ямар санагдсан бэ?

-Тийм ээ, морь унаж үзсэн. Анх их эвгүй мэдрэмж төрж байсан ч гэсэн их таалагдсан шүү. Дараа зун ирэхдээ дахин морь унаж давхихыг хүсэж байна.

-Монголд хэр удах вэ?

-Дахиад нэг сарын хугацаанд Монголд байх бодолтой байгаа. Хийх ажил их байна.

-Дуучин Г.Энэрэлтэй хамтарч уран бүтээл гаргана гэж байсан. Ямар уран бүтээл гаргах төлөвлөгөөтэй байгаа вэ?

-Өнгөрсөн хугацаанд хоёр тал их завгүй ачаалалтай ажиллаж байсан. Бид аль эртнээс уран бүтээлээ гаргана гэж ярьсан боловч амжихгүй байсаар өдийг хүрсэн. Хэзээ уран бүтээл хийх нь бас тодорхойгүй байгаа.

-Цаашдаа монгол дуу дуулах уу?

-Бид Японоор дуу гаргах хүсэлтэй байгаа ч Монголд ирснийх монгол дуу гаргах хүсэл төрсөн. Бүр зориод монгол дуунууд гаргах давлагаа өрнүүлж байгаа.

-Монголын талаас өөр уран бүтээлчид танай хамтлагтай хамтрах санал ирвэл  хүлээж авах уу?

-Манай хамтлаг монгол уран бүтээлчидтэй хамтарч дуу хийх хүсэлтэй байгаа. Цаашдаа хамтарч уран бүтээлээрээ дамжуулан монгол дуучдыг Японд таниулахыг хүсэж байна.

Эх сурвалж: ӨГЛӨӨНИЙ СОНИН