Н.Дашболдцэцэг гурав дахь удаагаа УЛСЫН АВАРГА боллоо

2022 онд Бодибилдинг Фитнессийн спортоор тив, дэлхийд эх орноо төлөөлөн оролцох баг, тамирчдыг тодруулах “Монголын Мистер 2022” тэмцээн болж байна.

“Монголын Мистер 2022” УАШТ-ийн “Бикини модель -160” ангилалд “Эрхэт Монгол" группийн тамирчин, “Голден Жим Өмнөговь” фитнес клубийн багш Н.Дашболдцэцэг түрүүлж, алтан медаль хүртлээ.

Н.Дашболдцэцэг ийнхүү гурав дахь удаагаа улсын аварга болж байгаа юм. Дэлхийн аварга шалгаруулах тэмцээнд эх орноо төлөөлөн оролцох түүнтэй холбогдлоо.

-Гурав дахь удаагаа улсын аварга болж байгаад нь баяр хүргэе...

-Баярлалаа. Би 2020, 2021, 2022 онд ийнхүү дараалаад улсын аварга болж байна. Бикини модель -160 см хүртэлх ангилалд өрсөлдлөө.

-Энэ спортоор хичээллээд хэдэн жил болж байгаа вэ. Олон улсын тэмцээн уралдаанд ямар ямар амжилт гаргаж байв?

-Би энэ спортоор хичээллээд таван жил болж байна. 2019 онд олон улсын “Golden time” тэмцээнд оролцож, Шилдэг 10-т шалгарч, хүрэл медаль хүртэж байсан. Үүнээс хойш цар тахлын хөл хорионы улмаас гадагшаа яваагүй байгаа. Одоо арваннэгдүгээр сард Дэлхийн аварга шалгаруулах тэмцээнд явах төлөвлөгөөтэй байгаа. ДАШТ хаана болох нь тодорхойгүй байгаа. Ямар ч байсан нэгдүгээр байранд орж, ДАШТ-д явах эрхээ авлаа. Анхны ДАШТ-дээ явах гэж байна.

Н.Дашболдцэцэг мөн 2019 онд Монгол Улсад анх удаагаа зохион байгуулагдсан дэлхийн хэмжээний, мэргэжлийн бодибилдинг фитнесийн тамирчны эрх олгох "IFBB Pro Qualifier Mongolia" тэмцээнд амжилттай оролцож, “Bikini model 155” ангилалд алтан медаль хүртэж байсан юм.

Бодибилдинг, эв нэгдэл Спорт-Олимпизмын үзэл санааг сурталчлан дэлгэрүүлэх, хүн амын сонирхол, бодит хэрэгцээнд нийцсэн биеийн тамир, спортын үйл ажиллагаа, бие бялдрын боловсролын хүртээмжийг нэмэгдүүлэх, Бодибилдинг фитнессийн спортыг нийт иргэдийн зөв амьдралын хэв маяг, эрүүл аж төрөх ёсны хэрэглээ, ажиллах чадварыг дээшлүүлэх хэрэглүүр болгох зорилготой “Монголын Мистер 2022” 31 дэх удаагийн бодибилдинг фитнессийн Улсын аварга шалгаруулах тэмцээн нийт 13 төрөл 26 ангиллаар зохион байгуулагдана.