Н.Мөнхбат бизнес ангиллаар нисэж, тансаг зэрэглэлийн зочид буудалд тухалдаг байжээ

Өнгөрсөн 2016 оны наймдугаар сарын 17-нд Засгийн газраас байгуулагдсан ажлын хэсгийн гишүүд Хөгжлийн банкинд хийсэн шалгалтын тайланг улсын нууцаас гаргаж, ил болголоо.

Уг тайланд тухайн үеийн Хөгжлийн банкны удирдлагаар ажиллаж байсан Н.Мөнхбатын үрэлгэн байдлыг тоо баримттай харуулжээ.

Тайлангаас харахад, Н.Мөнхбат нь гадаад албан томилолтын төсвийг тухайн үед хүчин төгөлдөр мөрдөгдөж байсан Хөгжлийн банкны Гүйцэтгэх захирлын 2013 оны есдүгээр сарын 25-ны өдрийн А-127 тоот тушаалаар баталсан “Албан томилолтын журам”-д зааснаас хэт өндрөөр батлан зарцуулах “Албан томилолтын журмын” 4 дүгээр зүйлийн 4.1.4-т заасан “Бусад /виз, бусад хураамж, бэлэг дурсгал, хүлээн авалт/ гэх заалтыг үндэслэн тодорхой тайлбаргүйгээр их хэмжээний мөнгийг төсөвлөн батлуулах зэргээр хэт үрэлгэн зарцуулдаг байжээ. Тэрбээр гадаад албан томилолтын нислэгийг тогтмол бизнес ангиллаар захиалах, өндөр зэрэглэлийн зочид буудалд байрлах зэргээр "тансаглаж" байсан нь доорх баримтаас харагдаж байна. 
 

• Гүйцэтгэх захирал асан Н.Мөнхбатын 2014 онд Санкт-Петербург хотод хийсэн албан томилолтын 3 хоногийн зочид буудлын төлбөрт 11,925,000 нислэгийн тийзэнд 8,985,000 төгрөгийг төсөвлөн баталжээ. Мөн уг айлчлалаар Эдийн засаг хөгжлийн яамны сайд Н.Батбаяр болон Bloomberg телевизийн хөтлөгч зураглаач нарын буудлын төлбөр болон 1 хүний хоногийн 1,224,300 төгрөг болон замын зардлыг Хөгжлийн банкнаас гаргасан байна. (ТУЗ-ийн 2014.05.20, 30-р тогтоол)
   
• Гүйцэтгэх захирал асан Н.Мөнхбатын Хонконг хотод чуулга уулзалтад оролцох 3 хоногийн нийт зардал 8,691,703 төгрөг, нэг хоногийн буудлын төлбөр 786 ам.доллараар төсөвлөгдсөн (ТУЗ-ийн 2016.04.04, 29-р тогтоол)
   
• Гүйцэтгэх захирал асан Н.Мөнхбатыг 2013 онд Ерөнхий сайдын ажлын хэсэгт оролцуулан БНХАУ-ын Бээжин хотод томилолтоор ажиллуулах төсөвт Эдийн засгийн хөгжлийн сайд Н.Батбаяр болон дагалдан явах орчуулагчийн Бээжин хотод байрлах зочид буудлын зардлыг тусгасан байсан ба 1 хүний хоногийн зочид буудлын төлбөр 2,908,350 төгрөг, бусад зардалд 5000 ам.доллар төсөвлөжээ. (ТУЗ-ийн 2013.10.21, 68-р тогтоол/
   
• ТУЗ-ийн нэр бүхийн 4 гишүүн болон ТУЗ-ийн нарийн бичгийн дарга нарыг 2015 онд Авсрали улсын Сидней хотод 4 өдрийн сургалтад хамруулсан нийт зардал 90,857,530 төгрөг болжээ. /ТУЗ 2015.01.28 6-р тогтоол/

ДЭЛГЭРЭНГҮЙ МЭДЭЭЛЭЛ: ОУВС-ГИЙН ХӨТӨЛБӨРТ ОРОХЫН ТУЛД НУУЦ БОЛГОСОН ХӨГЖЛИЙН БАНКНЫ 132 ХУУДАС МАТЕРИАЛ ИЛ БОЛЛОО