Г.Ёндон: Том төслүүд хэрэгжсэнээр нүүрс, зэсийн экспорт 2-3 дахин өснө

Э.Мөнхжин | Zindaa.mn
2022 оны 04 сарын 04

Монгол Улс өнөөгийн байдлаар нүүрс, зэс, төмрийн хүдэр, алт, хайлуур жонш, цайр зэрэг 10 гаруй нэр төрлийн уул уурхайн бүтээгдэхүүн олборлон анхан шатны боловсруулалт хийж экспортод гаргаж байна.

2021 оны жилийн эцсийн байдлаар 30.1 сая тн нүүрс, 1.3 сая тн зэсийн баяжмал, 19.0 тн алт, 6.3 мян.тн молибдений баяжмал, 3.7 сая тонн төмрийн баяжмал, 118.3 мян.тн жонш, 60.3 мян.тн жоншны баяжмал, 75.2 мян.тн цайрын баяжмал, 9.2 сая тн төмрийн хүдэр олборложээ.

Цар тахлын улмаас БНХАУ хилээ хааснаас шалтгаалан нүүрсний экспорт 56.3%, төмрийн хүдэр, баяжмалын экспорт 88.9%-ийн гүйцэтгэлтэй байсан бол бусад ашигт малтмалын олборлолт, экспортын гүйцэтгэл харьцангуй сайн байсан гэж УУХҮЯ-наас мэдэгдлээ.

Цаашид стратегийн болон нөөц нь тогтоогдсон томоохон ордуудыг эдийн засгийн эргэлтэд оруулж, ордыг иж бүрэн ашиглах чиглэлээр Оюутолгойн далд уурхай, Тавантолгойн цогцолбор төсөл, Цагаан суварга, Зүүн цагаан дэл, Асгат, Баянхөндий, Алтанцагаан Овоо зэрэг томоохон төслүүдийг хэрэгжүүлж байна.

Дээрх төслүүд хэрэгжсэнээр зэсийн баяжмалын экспорт 3 дахин, нүүрсний экспорт 2-3 дахин нэмэгдэх боломжтой гэж салбарын сайд мэдэгдэв.

 

Сэтгэгдэл ( 1 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Эгэл(139.5.217.121) 2022 оны 04 сарын 04

Монгол ардын үлгэрээ дуусга Ён дон сайдтаан. Мөрөөдөл ярихын оронд ажлаа шуурхайл

0  |  0
Top