Л.Оюун-Эрдэнэ: Төв банкны Ерөнхийлөгчийг огцруулахгүй

Засгийн газраас өнөөдөр /2022.04.05/ мэдээлэл хийж байна.

Хэвлэлийн хуралд Ерөнхий сайд Л.Оюун-Эрдэнэ болон сайд нар оролцож байна. Тэд өнөөдөр УИХ-д өргөн барьсан Олон улсын хямралт нөхцөл байдлаас үүдэлтэй гол нэр төрлийн бараа бүтээгдэхүүний үнийн өсөлт, хомсдолоос сэргийлэх, нөлөөллийг бууруулах тухай хуулийн төсөл болон дагалдах бусад хууль тогтоомжийн төслийн талаар мэдээллийг өгч байна. 

Ерөнхий сайд Л.Оюун-Эрдэнэ:

-Монгол Улсаас болж байгаа болохгүй байгаа зүйл бий. Амаргүй нөхцөл байдалд явж байна. Засгийн газар хэн нэгний хэлж байгаагаар огцроод байдаг зүйл биш. Өнгөрсөн хугацаанд 1,5 жилийн настай олон арван Засгийн газрыг үйлдвэрлэсэн. Хүнд нөхцөл байдлыг иргэдтэй хамт даваад гарна.

Бид нэг өдрийн дотор сайд, Төрийн нарийн бичгийн даргыг огцруулж байсан. Ажлаа хийж байгаа хүнийг би хамгаална.

Монголбанк дотор хэдэн залуучууд шүгэлдээд байгаа талаар сонссон. Аятайхан байгаарай. Гишүүдийн өрөөнд ороод би Монголбанкны Ерөнхийлөгч болно гэж ярьсан байсан. Залуучууд аа амбиц аа татаж сураарай. Ийм нөхцөл байдал үүсээд байхад албан тушаалын дон шүглээд далчиганаад хэрэггүй.

Төв банкны Ерөнхийлөгч огцрохгүй, ажлаа хийгээд явна.

Энд байгаа хэдэн нөхөд янз бүрийн юм яриад явж байгааг би сонссон. Та хэдэд би бууж өгөхгүй. Битгий горьд.

Хөгжлийн банк, Хөтөл гээд доргилт өгөхөөр дагаад доргидог схем байдаг. Удахгүй энэ бүхэн ил болно. Цаг үе амаргүй байна. Монгол Улс ганцаараа ийм байгаа юм биш. Ийм зүйл боллоо гээд ярихгүй өнгөрч болохгүй.