Г.Батбаяр: Миний охин сэтгэл зүйн дорой байдалд хүмүүжээгүй

АН-ын хуулийн зөвлөх Г.Батбаярын охин Б.Ариунзаяа бусдын толгой дээр кофе асгаж, тэрхүү бичлэг нь олон нийтийн сүлжээнд цацагдсан. Маш их шүүмжлэл дагуулсан энэ явдалдаа Б.Ариунзаяа огт гэмшихгүй байгаагаа илэрхийлж байсан удаатай. Б.Ариунзаяа хуульч мэргэжлээр МУИС-д суралцаж байсан ч сургуулиасаа хөөгдсөн билээ. Түүний аав Г.Батбаяраас тухайн нөхцөл байдлыг охинтойгоо хэрхэн даван туулсан талаар тодрууллаа.

-Танай охинд тохиолдсон үйл явдлыг та бүхэн хэрхэн даван туулж байна вэ. Аав хүний хувьд та охиндоо ямар зөвлөгөө өгсөн бол?

-Хүний амьдралд байдаг л зүйл. Ер нь бол үхэл хагацлыг л зовлон гэж ойлгох хэрэгтэй. Бусад нь бол зүгээр л асуудал юм. Залуу хүн омголон зангаар алдаа гаргажээ. Миний охиныг сургуулиас хөөсөн МУИС-ийг захиргааны хэргийн шүүхэд өгсөн, маргаж байна. Бусад асуудал бол хуулийн дагуу шийдэгдэнэ. Тэр болсон явдал бол хүний амьдралд байнга л тохиолдож байдаг тийм л зүйл. Түүнээс биш хүн алж, хүрээ талсан зүйл тохиолдоогүй.  

Кофе асгасан, асгаагүй гэдэг маргаан байгаа. Энэ маргаан хуулийн дагуу шийдэгдэнэ. Миний охин энэ явдлаас маш их сургамж авч, амьдралдаа дахин алдаа гаргахгүй байх тал дээр хичээж байгаа. 

-МУИС-ийн Хууль зүйн сургуулиас хөөгдсөн тушаалын эсрэг танай гэр бүл зарга үүсгэсэн гэж ойлгож болох уу?

-МУИС-ийн Б.Очирхуяг захирлын тушаалыг хүчингүй болгуулахаар маргалдаж байгаа. Тушаал гаргахдаа дүрэм, журмын дагуу шийдсэн эсэх асуудлаар маргалдана. Бэлтгэгдэж л байна. Захиргааны маргаан үүссэн явж байгаа.

-Ил харагдаж байгаагаар таны охин илт буруутай мэт харагддаг. Хүний толгой дээр кофе асгах хэмжээнд ааш авир гаргахад нөлөөлсөн зүйл нь юу вэ. Энэ талаар таны охин тайлбар хэлсэн үү?

-Манайд хуульчлаагүй нэг зүйл бол муухай харах явдал юм. Зөрчлийн тухай хуулийн 5.2 дугаар зүйлд танхайгаар оруулж ирсэн. Гэтэл муухай харах асуудлыг Япон, Өмнөд Солонгост хуульчлаад өгчихсөн байдаг. Хятадад бол 2008 онд хуульчилж өгсөн. Хүн рүү 3 секундээс дээш удаан харах юм бол өндөр торгууль ногдуулдаг. Эсрэг хүйсийн хүн рүү ширтэх юм бол бэлгийн дарамт үзүүлсэн гэдгээр хорих хүртэл ялтай. Манайд үүнийг хуульчилж өгөөгүйгээс болоод 60, 70-аад оноос эхлээд бусад руу муухай харах нь танхайрал, хэрүүл маргааны сэдэв болж ирсэн. Гэтэл хараа муутай хүмүүс муухай харж болдог.

Миний охинд тохиолдсон зүйл дээр тэр охид хэрүүл маргаан үүсгэх зорилгоор өдөөн хоргоосон гэдгээ мэдүүлгээрээ хүлээсэн. Хоёр гартаа кофе барьсан байгаа хүнийг өвдөг сөгдөөд, гутал арч гэдэг нь байж болшгүй шаардлага байхгүй юу. Өвдөг сөгдөөд, гутал арч гэдэг шаардлага тавьж байгаа бичлэгээ хийчихсэн байсан. Тэндээсээ харин өөрт ашигтай хэсгээ тасдаад цацсан байсан.  

Дөрөв, тавуулаа нийлж бусдыг гадуурхдаг, өнгөтэй өөдтэй хүүхдийг дарамталж, мөнгө төгрөг олдог байж болзошгүй асуудлыг нь шалгуулж байгаа.

Тэр охин Хүмүүнлэгийн их сургуульд сурдаг. Гэтэл бусдын бичлэгийг сошиалд тараадаг, зөрчилтэй байдал гаргадаг байж болзошгүй охиныг сургуулиас нь хөөгөөгүй байгаа шүү дээ. Тэгсэн хэрнэ миний охиныг сургуулиас нь хөөлөө. Магадгүй миний охин болохоор тийм асуудал гаргадаг байж болзошгүй.

Эрүүгийн хуулийн 14.1 дүгээрт заасан ялгаварлан гадуурхсан гэдгээр МУИС-ийг шүүхэд өгөх эрх маань нээлттэй байгаа. Гэхдээ үргэлжилсэн гэмт хэргийн олонлогт аваад, нэг жилийн дараа хөөн хэлэлцэх хугацаа нь дуусах юм. Би ямар ч байсан тэр сургуулийн Б.Амарсанаа, С.Нарангэрэл нарыг шалгуулахаар өгнө.
 

-Сошиалд нийтээрээ нэг хүн рүү дайрах энэ мэт тохиолдодл тухайн хүн сэтгэлзүйн дарамтад ордог. Таны охины хувьд сэтгэл санаа ямар байна вэ?

-Миний охин зүгээр байгаа. Ер нь бол хажууд түшиж байгаа гэр бүлийн хүнээсээ маш их урам авдаг. Гэхдээ хүнийг үгээр үхүүлж болдог, үгээр сэхээж болдог. Охин маань энэ үйл явдлаас том сургамж авсан. Цаашид болгоомжтой байх ёстой юм байна гэдэг ойлголттой болсон. Манайд сошиал орчин замбараагүй хөгжиж байгаа. Доромжлох гэдэг зүйл, заалт 2002 оны Эрүүгийн хуульд байсныг 2017 долдугаар сарын 1-нээс хассан. Гүтгэх нь байгаад байдаг, доромжлох нь байхгүй. Доромжлох гэдэг заалт хуучин Эрүүгийн хуулийн 111.1 дүгээрт байсан. Энэ заалтыг хассанаас болж хүүхдүүд амиа хорлох тохиолдол нэмэгдэж байгаа. Гэхдээ миний охин сэтгэл санаагаар их унаад байдаггүй. Цаадах чинь өөрөө эршүүд талдаа.  

-МУИС-д эргээд орлоо гэхэд Б.Ариунзаяагийн эрх зөрчигдөхгүй гэх байх баталгаа байхгүй. Сургуулийн орчинд түүнийг хэрхэн хүлээж авахаас шалтгаалж хүний эрх зөрчигдөж ч мэдэх юм. Та энэ талаас нь бодож үзсэн үү?

-Миний охины эрхэнд халдаж байгаа хүүхдүүдийг зохих ёсны дагуу цагдаад өгөөд, шалгуулаад, тухай бүрд нь тохирсон арга хэмжээг нь аваад явна. Түүнээс биш үргэлж хэн нэгнээс айж явах юм бол хүн болж төрөөд яах юм бэ. Миний охин сэтгэл зүйн дорой байдалд өсөж хүмүүжээгүй юм.