"The night with us" тоглолт ЦУЦЛАГДЖЭЭ

Энэ сарын 24-ны өдөр зохион байгуулагдахаар товлогдоод байсан "Камертон", "Никитон", "Харанга" зэрэг хамтлагуудын хамтарсан "The night with us" тоглолт цуцлагджээ. 

Төв цэнгэлдэх хүрээлэнд тоглогдох байсан тус тоглолтыг Үндэсний их баяр наадмын бэлтгэл ажилд саад болсон гэх үндэслэлээр ийнхүү цуцлаад байгаа аж. 

Тус тоглолтын бэлтгэл ажилд нийт 500 сая гаруй төгрөгийн бодит зардал зарцуулагдаад байгаа гэнэ. Мөн олон хүний хөдөлмөр үнэгүйдэхэд хүрээд байгаа учир холбогдох албаны хүмүүс энэ тухай мэдээлэл хийхээр болжээ. 

Нэмэлт мэдээлэл: 

Энэ тухай Камертон хамтлагийн гишүүн Г.Мэнд-Амар өнөөдөр мэдээлэл хийлээ. 

Тэрээр хэлэхдээ "Энэ жилийн хувьд Ардын хувсгалын түүхт 100, 101 жилийн ой тохиож байна. Тиймээс энэ жилийн наадамд ихээхэн ач холбогдол өгч байгаа. Үүнтэй холбогдуулан бэлтгэл ажил ихээр хийгдэж байгаа учир тоглолт цуцлах гэнэтийн шийдвэр гарлаа. Тийм учраас зохион байгуулж байгаа хүмүүс ярилцаад тоглолтоо Үндэсний соёл амралтын хүрээлэнд хийхээр болоод байна. Бидний хувьд их гэнэтийн шийдэр байлаа. Олон сар төлөвлөсөн ажил учир их хэмжээний зардал гарсан нь ойлгомжтой. Гэхдээ өөдрөг талаас нь харахыг хүсэж байна. Төв цэнгэлдэхэд наадам маань хийгддэгээрээ хийгдэх ёстой. Бид бүгдийн хувьд амласан тоглолтоо үзэгч олондоо толилуулах болно" гэлээ.

"Night with us" тоглолт товлогдсон өдрөө Үндэсний соёл амралтын хүрээлэн буюу Хүүхдийн паркд тоглогдохоор болсон бөгөөд тасалбар хэвийн худалдаалагдаж байна.