Ц.Жамсранжав агсны нэрэмжит "Мөнгөн сум" тэмцээний аваргууд тодорлоо

Байт харвааны "Нийслэл өргөө" клубын дасгалжуулагч, Спортын мастер Дуутан овогт Цэрэнпилийн Жамсранжав агсны нэрэмжит "Мөнгөн сум" дөрөв дэх удаагийн тэмцээн өнгөрсөн амралтын өдрүүдэд амжилттай явагдаж өндөрлөлөө. "Мөнгөн сум" байт харвааны нэрэмжит тэмцээн нь 2 жилд 1 удаа болдог бөгөөд энэ жил 4 дэх удаагаа зохион байгуулагдлаа.

Хамгийн анхны "Мөнгөн сум" тэмцээн 2015 онд заалны 18м зайд зохион байгуулж байсан юм. Үүний дараа баг, тамирчдыг чавхижуулах, олон улсад улсад өрсөлдөх чадварыг нэмэгдүүлэх зорилгоор Олимпын зай буюу гадаа талбайн 70 метрийн зайд зохион байгуулж эхэлсэн бөгөөд 3 дахь удаагийн тэмцээн ийн болж өндөрлөлөө.

Дөрөв дэх удаагийн тэмцээнд 100 гаруй тамирчин оролцож байгаагаас өсвөр насны 36, насанд хүрэгчдийн 67 тамирчин цэц мэргэнээ сорилоо. Хоёр насны ангилалд ганцаарчилсан, эрэгтэй, эмэгтэй багийн, холимог багийн төрлүүдэд нийт 21 багц медалийн төлөө баг, тамирчид өрсөлдсөн юм.

Хүндэт багш, дасгалжуулагч Ц.Жамсранжав агсны нэрэмжит "Мөнгөн сум" тэмцээний нэгэн онцлог нь залуу харваачдаа дэмжих. Энэ хүрээнд өсвөр үеийн эрэгтэй, эмэгтэй урьдчилсан харваанд хамгийн өндөр оносон тамирчдад мөнгөн урамшуулал олгодог. Тус шагналыг өмнөх тэмцээнд насанд хүрэгчдийн төрөлд түрүүлсэн эрэгтэй, эмэгтэй аваргууд гардуулдаг уламжлалтай.

Энэ удаагийн урамшууллыг анхны тэмцээний аварга Спортын мастер Л.Баярсайхан Эрдэнэт үйлдвэр ТӨҮГ-ын Хангарьд спорт клуб, Орхон аймгийн тамирчин Б.Мөнхбаясгаланд гардуулсан бол  "Мөнгөн сум" гурав дахь удаагийн тэмцээний аварга ОУХМ А.Энхтуяа Ирээдүйн одод сургууль, Орхон аймгийн тамирчин Ө.Халиунд гардуулсан юм.

Мөн тус тэмцээнийг зохион байгуулагч хамт олон шинэ залуу, өсөх ирээдүйтэй, идэр харваач болон ахимаг насны, спорт сонирхогч хэн бүхнийг ялгахгүй нэг гоё зохицуулалт хийсэн нь "холимог баг"-ийн харвааны оноолт. Байт харваан тэмцээнд байгууллага бүрээс хамгийн өндөр оносон эмэгтэй, эрэгтэй тамирчид оноолт таарч хамтран өрсөлддөг бол "Мөнгөн сум" тэмцээнд сугалаагаар таарсан харваачид хоорондоо оноолт таарч харвадаг.