Жүжигчин Энн Хеш автомашины ослоор ТААЛАЛ ТӨГСЛӨӨ

Алдарт жүжигчин Энн Хеш автомашины ослоос үүдсэн гэмтлийн улмаас нас баржээ. 53 нас хүрч байсан тэрээр орон нутгийн цагаар өнгөрөгч баасан гарагт таалал төгссөн бөгөөд ослын дараа эмнэлэгт хүргэгдэн эмчлүүлж байсан ч эмчилгээ түүний амийг аварч чадсангүй. 

Энэ сарын 5-ны өдөр жүжигчин бүсгүйн цэнхэр өнгийн Mini Cooper маркын машин хяналтаа алдан байшин мөргөж, улмаар шатаж буй нь хяналтын камерт бичигдэн үлджээ. Яаралтай тусламжийнхан ирж, түүнийг авч явсан ч тархи нь үхжиж, уушги нь амьсгалахад хүндрэлтэй болсон тухай эх сурвалжууд мэдээлжээ. 

Цагдаа нар түүний цуснаас кокайн, фентанилтай төст бодис илэрсэн тухай мэдээлжээ. Гэсэн ч энэ нь түүнийг осолд ороход нөлөөлсөн хэмээн дүгнэхэд учир дутагдалтай хэмээн үзсэн байна. Учир нь түүний өвдөлтийг намдаах зорилгоор хэрэглэсэн эм бэлдмэл нь ийнхүү цусны шинжилгээгээр гарч ирсэн байж болзошгүй гэжээ. 

Түүний гэгээн дурсгалыг хүндэтгэн Холливудын одон эмгэнэл илэрхийлсээр байгаа бөгөөд хөвгүүд нь хүнд цагийг хамтдаа даван туулж буй бүх хүмүүст талархлаа илэрхийлсэн байна.