Жүжигчин Пак Юн Бин: Аутизмтай хүмүүсийн тухай бичлэг үзэхийг хүсээгүй

Аутизмын спектрийн эмгэгтэй өмгөөлөгч Ү Ён Ү-ийн тухай өгүүлэх "Этгээд өмгөөлөгч Ү Ён Ү" цуврал дэлхий нийтийн анхаарлыг татаад байгаа билээ. Нээлтээ хийсэн эхний долоо хоногтоо Netflix-ийн гадаад хэл дээрх шилдэг 10 цувралын жагсаалтыг тэргүүлсэн уг кино дөрвөн долоо хоногийн турш шилдгээр шалгарсан юм.

Уг киноны гол дүрийг бүтээсэн жүжигчин Пак Юн Бин уг кинонд тоглохоос татгалзсан болон дүр бүтээсэн тухайгаа "Энэ цуврал надад хөнгөн байдлаар хандах зүйл биш юм шиг санагдсан. Кино зохиол сайн хэдий ч жүжигчин дүрээ маш сайн гаргах хэрэгтэй байсан. Зохиолоо уншиж байхдаа дүрээ төсөөлөн бодож, хэрхэн гаргах ёстойгоо дүрслэн боддог л доо. Гэхдээ энэ кино, дүрийн хувьд надад ямар ч төсөөлөл буухгүй байсан. Тийм болохоор дүрээ сайн гаргаж чадах болов уу гэж их санаа зовдог байлаа. 

Үнэндээ найруулагч болон зохиолчтойгоо уулзахаар явж байх үедээ өөрийн биеэр энэхүү дүрээс татгалзаж буйгаа хэлэхээр явж байсан юм. Гэхдээ тэд надтай сайхан яриа өрнүүлж, энэхүү дүр надад төгс тохирно гэж итгүүлсэн. 

Би дүрээ үргэлж ганцаараа бэлддэг байсан. Энэ нь надад илүү хялбар, бас тухтай байдаг байсан ч энэ киноны хувьд бусадтай хамтарч ажиллах нь үр дүн өгсөн. 

Өмнөх киноны зураг авалт дууссанаас ердөө хоёр долоо хоногийн дараа "Этгээд өмгөөлөгч Ү Ён Ү" цувралын зураг авалт эхэлсэн. Дүрдээ бэлдэх хурдан бөгөөд үр дүнтэй арга хайсан. Гэхдээ өмнө нь хэвлэл мэдээлэл, кинон дээр гарч байсан аутизмтай хүмүүсийн тухай судлахыг хүсээгүй. Мөн бодит амьдрал дээрх аутизмтай хүмүүсийн бичлэг үзэхийг хүсээгүй. Хэрвээ үзчихвэл тэднийг жүжиглэхдээ ашиглах юм шиг санагдаад байсан болохоор зөвхөн Ү Ён Ү өмгөөлөгчийн өвөрмөц ертөнцийг өөрийнхөөрөө бүтээхээр шийдсэн. Тийм болохоор аутизмын спектрийн оношилгооны шалгуурыг түлхүү судалсан. 

Би аутизмтай хүмүүст болон тэдний гэр бүлийнхэнд хор хөнөөл учруулахгүй байх арга зам олохыг хичээсэн. Ү өмгөөлөгчийн амьдрал хачирхалтай, содон боловч үнэ цэнтэй, мөн үзэсгэлэнтэй гэдгийг илэрхийлэх нь надад таалагдсан" хэмээжээ.