Бүгд найрамдах Казахстан улсаас Монгол Улсад суугаа Элчин сайд Г.Койшибаевыг хүлээн авч уулзав
Гадаад харилцааны сайд Б.Батцэцэг Бүгд Найрамдах Казахстан Улсаас Монгол Улсад суугаа Онц бөгөөд Бүрэн эрхт Элчин сайд Габит Койшибаевыг 2022 оны есдугаар сарын 1-ний өдөр хүлээн авч уулзав.
Уулзалтын эхэнд Гадаад харилцааны сайд Б.Батцэцэг энэ онд тохиож буй Монгол, Казахстаны хооронд дипломат харилцаа тогтоосны 30 жилийн ойн мэндийг дэвшүүлж, хоёр улсын найрсаг харилцаа, хамтын ажиллагаа хоёр талын хүчин чармайлтаар өргөжин хөгжиж байгааг тэмдэглэв.
Талууд хоёр талын улс төр, худалдаа, эдийн засаг, тээвэр логистик, хөдөө аж ахуй, соёл, боловсрол, аялал жуулчлалын зэрэг салбарт харилцаа, хамтын ажиллагааг өргөжүүлэх болон олон улс, бүс нутгийн тавцан дахь хамтын ажиллагааны талаар ярилцав. Мөн энэ оны IV улиралд Улаанбаатар хотноо зохион байгуулах Монгол, Казахстаны Засгийн газар хоорондын комиссын IX хуралдаанд чухал ач холбогдол өгч, эдийн засгийн хамтын ажиллагааг бодит агуулгаар баяжуулахын төлөө буйгаа талууд нотлов.
Элчин сайд Г.Койшибаев Монгол Улсад томилогдон ажиллах хугацаандаа хоёр талын харилцааг бэхжүүлж, худалдаа, эдийн засаг, соёл, хүмүүнлэгийн салбар дахь хамтын ажиллагааг эрчимжүүлэхэд онцгойлон анхаарч ажиллахаа илэрхийлэв.
Холбоотой мэдээ
Сэтгэгдэл ( 0 )