Ц.Цогтбаатар: Монгол хүн бүхнийг чадна

Узбекистаны нийслэл Ташкент хотод жүдо бөхийн ДАШТ үргэлжилж байна. Тус  тэмцээний эрэгтэй 73 кг-ын жинд Токио-2020 олимпын хүрэл медальт Цэнд-Очирын Цогтбаатар алтан медаль хүртсэнээр  манай улс жүдо бөхийн төрөлд тав дахь аваргаа тосож авлаа.

Тэрбээр тус тэмцээнд  учраа бүрээ илүүрхэн ялсан юм. Тодруулбал, нэгийн даваанд Израилийн залуу бөх И.Левинийг торгуулиар, Румыний А.Сулкаг хоёр вазаригаар,  шөвгийн наймд Канадын А.Маргелидоныг өчих мэхээр цэвэр ялж, шилдэг дөрөвт үлдсэн. Финалд дэлхийн аварга Японы алдарт бөх Соичи Хашимотог нэмэлт цагт хутгах мэхээр ялснаар ДАШТ-ээс  алтан медаль хүртсэн тав дахь монгол жүдоч болсон юм.

Монголын жүдогийн түүхэнд Х.Цагаанбаатар 2009 онд, М.Уранцэцэг 2013 онд, Г.Болдбаатар 2014 онд, Д.Сумъяа 2017 онд дэлхийн аварга болсон түүхтэй.

Аварга болсон торгон мөчид монголчууддаа хандаж хэлсэн түүний үгийг хүргэе.

-ДАШТ-нээс жүдогийн төрөлд  тав дахь аварга боллоо. Баяр хүргэе?

-Баярлалаа. Надад итгэж, дэмжиж, хүлээж суугаа монголчууддаа бүгдэд нь баярлалаа. Монголын жүдо бөхийн эрэгтэйчүүдийн шигшээ багаас найман жилийн дараа дэлхийн аварга төрлөө. Ганц миний бус баг хамт олон, багш дасгалжуулагч, гэр бүл, найз нөхөд гээд олон хүний оролцоо, сэтгэлийн дэмжлэг байлаа. Намайг дэмжиж, захыг минь мушгиж хүлээсэн монголчууддаа  баярлалаа.

-Тамирчдын ар тал, гэр бүл ямар ч үед том найдвар байдаг байх?

-Тэгэлгүй яах вэ. Тамирчин хүний ард гэр бүл, ах дүү хамаатан садан, ивээн тэтгэгч байгууллагууд гээд  тусалж дэмжсэн олон хүн байдаг. Энэ хүртэл тусалж дэмжсэн ШШГЕГ-ын “Сүлд” спорт хороо, Улаанбаатар хотын УСУГ, Наранмандал компанийн хамт олондоо талархаж байгаагаа илэрхийлье. 

-Таны дараагийн зорилго юу вэ?

-Миний дараагийн зорилго бол Парис -2024 олимпын наадам. Олимпоос алтан медаль хүртэж, дахин дэлхийн аварга болохыг хүсэж байна. Тамирчин байх хугацаанд өөрийн хийж чадах бүх зүйлийг  хийнэ. Хэдэн ч удаа байсан хамаагүй олимп, дэлхийн медальтан болохыг хүсэж байна. Монгол хүн бүхнийг чадна. Чадсаар ирсэн. Та бүхэнд сайн сайхныг ерөөе.

Ч.ЗОТОЛ

Эх сурвалж: Өглөөний сонин