О.Магнай Ливан улсын иргэний ЭД ХӨРӨНГИЙГ ЗАЛИЛСАН хэргээр шүүгдэж байна

Энэ сарын 7-ны өдөр Ерөнхий сайд Л.Оюун-Эрдэнийн захирамжаар Гадаадын хөрөнгө оруулагчдын эрх ашгийг хамгаалах асуудлаар санал, дүгнэлт гаргах үүрэг бүхий Ажлын хэсгийг байгуулсан.

Ажлын хэсгийг Хууль зүй, дотоод хэргийн сайд Х.Нямбаатар ахалж байгаа бол бүрэлдэхүүнд Гадаад харилцааны сайд Б.Батцэцэг, Сангийн сайд Б.Жавхлан, ЗГХЭГ-ын дэд дарга Б.Солонгоо, ЦЕГ-ын Тэргүүн дэд дарга Ц.Ням-Очир, УБЕГ-ын дарга Д.Дэлгэрсайхан, АТГ-ын дарга З.Дашдаваа, ШШГЕГ-ын дарга Д.Загджав, ТЕГ-ын дэд дарга С.Хүдэрчулуун, Үндэсний хөгжлийн газрын дарга Х.Батжаргал нар багтжээ. 

Тэгвэл өнөөдөр /2022.10.28/ Хууль зүй, дотоод хэргийн сайд Х.Нямбаатар гадаадын хөрөнгө оруулагчдыг хохироосон дотоодын аж ахуйн нэгж болон иргэдийн нэрсийг зарлаж, олон нийтэд мэдээлэл хийв. 

Судалгаагаар өнгөрсөн 10 жилийн хугацаанд гадаадын хөрөнгө оруулагчдын эрх ашгийг хохироосон, залилсан 57 хэрэг бүртгэгджээ. Тэдний заримынх нь хэргийг хэрэгсэхгүй болгосон, цагаатгасан бол заримынх нь хэрэг мөрдөн байцаалт болон шүүхийн шатанд яваа талаар Хууль зүй, дотоод хэргийн сайд Х.Нямбаатар мэдээллийнхээ эхэнд тодотголоо. 

Өөрөөр хэлбэл, нийт 57 хэрэгт мөрдөн шалгах ажиллагаа явуулснаас 20 хэргийг хааж, 15 хэргийг хэрэгсэхгүй болгосон байна. Харин гурван хэрэг шүүхийн шатанд яваа бол дөрвөн хэргийг шүүхээр шийдвэрлжээ. Өнөөдрийн байдлаар 15 хэрэгт мөрдөн шалгах ажиллагаа явуулж байгаа аж. Мөрдөн шалгах ажиллагаа явуулсан нийт хэргийн 65 хувь нь залилах, бусад нь хөрөнгө завших болон мөнгө угаах, дээрэмдэх, авлигын гэмт хэргүүд эзэлж байгаа гэх мэдээллийг өглөө. 

Тухайлбал, ШӨХТГ-ын даргаар ажиллаж байсан О.Магнайд холбогдох хэрэг шүүхийн шатанд яваа аж. Тэрбээр Ливан улсын иргэний эд хөрөнгийг хууль бусаар шилжүүлэн авч, их хэмжээний хохирол учруулсан гэх үндэслэлээр яллагдагчаар татагдан шүүгдэж байна.