Монголын дуучид Олон улсын уралдааны ДЭД БАЙР эзлэв

Чеченийн Грозный хотод болсон “Орфей-2022” олон улсын уралдааны Дэд байрын шагналыг Монголын дуучин Д.Совд хүртжээ.

Түүний хоолой шүүгчид, үзэгчдийг уярааж, “торгон аргил” хоолой хэмээн шагшигдсан байна.

ЗХУ-ын Ардын жүжигчин Муслим Магомаевын дурсгалд зориулсан "Орфей” олон улсын уралдааныг зорин манай улсаас Даваасүрэнгийн Совд, Лхагвасүрэнгийн Түвшинсайхан нар алс холын Чечень улсын нийслэлд очсон билээ.

Аднан Шахбулатовын нэрэмжит Бүгд найрамдах Чечень улсын филармонийн тайзнаа өчигдөр “Монгол” гэх нэр хоёр удаа дуудагджээ. Монголын дуучин Л.Түвшинсайхан Оросын дуучдаас илүү дикцтэй дуулсан гэж магтуулж, нийт шүүгчдийн саналаар Бүгд найрамдах Чечень улсын Соёлын сайд Айшат Кадыровагийн нэрэмжит шагналын эзэн болжээ.

Олон улсын уралдааны болзол ёсоор энэ шагнал нь Дэд Гран при гэж эрэмбэлэгддэг аж.

“Орфей” олон улсын тавдугаар уралдаан нь 23 настай Д.Совд, 29 настай Л.Түвшинсайхан нарын хувьд анхны олон улсын чанартай уралдаан гэнэ.