К-Драма үзсэн Хойд Солонгосын гурван сурагч ЦААЗЛУУЛЖЭЭ

Хойд Солонгосын ахлах сургуулийн гурван сурагч Өмнөд Солонгосын олон ангит кино үзсэн хэргээр цаазлуулжээ. 

2022 оны аравдугаар сарын эхээр ахлах сургуулийн гурван эрэгтэй сурагч Өмнөд Солонгосын олон ангит кино үзэж, бусдад дамжуулсан нь ил болсон тул цаазын ял сонсож, цаазлуулжээ. Тэдэнтэй хамт хойд ээжийнхээ амийг хөнөөсөн өсвөр насны хүү мөн цаазлуулсан байна. 

Цаазаар авах ялыг Хятадтай хиллэдэг Хэсан хотын нисэх онгоцны буудалд, олны нүдэн дээр хийж гүйцэтгэжээ. 

2020 оны арванхоёрдугаар сард Хойд Солонгос Өмнөд Солонгосын дуу, дүрс бичлэг оруулж ирсэн болон тараан түгээсэн этгээдэд цаазын ял оноох хууль хэрэгжүүлж эхэлжээ. Өмнө нь насанд хүрээгүй хүмүүст ял шийтгэл ногдуулдаггүй байсан. Харин 2020 оны арванхоёрдугаар сараас эхлэн нас, хүйс үл хамааран ял ногдуулдаг болсон байна. 

Насанд хүрээгүй хүүхдүүд гэмт хэрэг үйлдсэн тохиолдолд насанд хүртэл нь өөр төрлийн ял шийтгэл ноогдуулдаг ч энэ удаад тэдэнд шууд цаазын ял оноожээ. Энэ нь нэг талаараа Хойд Солонгосын ард иргэдэд сануулга өгч байгаа хэрэг аж. 

Цаазын ял авсан хүүхдүүд Өмнөд Солонгос төдийгүй АНУ-ын телевизийн хэд хэдэн цуврал нэвтрүүлгийг үзсэн хэмээн мэдүүлжээ. Хөвгүүд дээрх дүрс бичлэгүүдийг найзууддаа дамжуулах гэж байгаад баригджээ. 

Гэсэн ч Хойд Солонгосын иргэдийн дунд Өмнөд Солонгосын контентууд өргөн тархсан хэвээр байна. Эх сурвалжийн мэдээлснээр судалгаанд оролцсон Хойд Солонгос иргэдийн 90 гаруй хувь нь "Squid Game", "Crash Landing On You" зэрэг цувралыг үзсэн хэмээн хариулсан байна.