Х.Нямбаатар: Аялал жуулчлалыг хөгжүүлье гэвэл Казиногийн тухай хуулийг заавал батлах ёстой

Хууль зүй, дотоод хэргийн сайд Х.Нямбаатар аялал жуулчлалыг хөгжүүлэхтэй холбоотой гурван хуулийн төслийг УИХ-д өргөн мэдүүлж буй талаар мэдээллээ. /2022.12.26/

Тэрбээр "УИХ-ын даргад Засгийн газраас гурван хуулийг өргөн мэдүүллээ. Үүнд: 

• Казиногийн тухай хууль
   
• Морин бооцоот уралдааны тухай хууль
   
• Төлбөр, тааварт тоглоомын тухай хуулийн төсөл юм. 

Казиногийн тухай хуультай холбоотой Монгол улсын эрх зүйн тогтолцоонд сонин, содон түүх байдаг. 1998 онд УИХ Казиногийн тухай хуулийг баталж гаргаж байсан. Харамсалтай нь тухайн үед үүссэн нөхцөл байдал, авлига албан тушаалын гэмт хэрэгтэй холбогдуулж, тухайн хуулийг хэрэгжиж эхлэхээс нь өмнө хүчингүй болгож байсан юм. 

Казино бол дэлхийн маш олон оронд цэнгээнт аялал, жуулчлалын хөтөлбөрт орж явдаг. Тиймээс Монгол Улсад аялал жуулчлалыг хөгжүүлье гэж байгаа тохиолдолд Казиногийн хуулийг заавал баталж, казино байгуулж, түүгээр дамжсан аялал жуулчлалын урсгалыг нэмэгдүүлэх шаардлагатай байгаа.

Хэн нэг хүн өөртөө болон бусдад давуу байдал үүсгээд, казиногийн хуулийн дагуу лицензийг аваад бусдад дамлан зарахыг энэ хуулиар хааж өгсөн.

Оролцогч Монгол Улсын Засгийн газарт 300 саяас дээш ам.долларын бодит хөрөнгө оруулалт оруулахаа илэрхийлснээр тухайн өрсөлдөөний явцад казиногийн тусгай зөвшөөрлийг олгоно.

Таван жилийн дараа нэмж тусгай зөвшөөрөл олгох эсэхийг УИХ шийднэ.

Хоёрдугаарт, казиногийн үйл ажиллагаа эхэлсэнээс хойш өдөр тутам олсон орлогынх нь 40 хувийг нь шууд казиногийн орлогын албан татвар болгож хураана. Хожсон тоглогчдоос татвар авахгүй.

Гуравдугаарт, 30 жилийн дараа нийт казиногийн ширээний 50 хувь нь Монгол Улсын Засгийн газрын өмчлөлд шилжинэ. Хуулийн төслийн үзэл баримтлалаар бол Хөшгийн хөндийн олон улсын нисэх буудлын зэрэгцээ казиногийн цогцолбор барьж байгуулах газрыг Засгийн газраас өгөхөөр төлөвлөсөн. Монголд ирсэн жуулчид тоглож болно. Монгол иргэд казиногоор орж үйлчлүүлэхгүй байх, хаалт хязгаарлалтууд тавьсан.

Мөн дэлхий нийтийн аялал жуулчлалын болон чөлөөт цагаа зөв боловсон өнгөрүүлдэг хамгийн том соёл бол морины соёл байгаа. 

Бид нүүдэлчин, морьтон монголчуудын удам хэдий ч сонгодог морин уралдааны соёл манай улсад төдийлөн орж ирээгүй байгаа. Манайхаас бусад бараг бүх улс оронд сонгодог морин уралдааны соёл өндөр хөгжсөн байдаг. Тэр утгаараа бид аялал жуулчлалын нэг том бүтээгдэхүүн болгож нөгөө талдаа залуучууд чөлөөт цагаа зөв боловсон өнгөрүүлэх соёл болгож, энэ хуулийг өргөн мэдүүлж байна.

Бооцоот төлбөрт, тааварт тоглоомын тухай хуулийг мөн өргөн барьсан. Сүүлийн жилүүдэд, ялангуяа миний нэр дээр хандаж маш олон эцэг, эхчүүд гомдол ирүүлсэн. Сүүлийн үед залуучууд цахим казинод их донтож, сургуулиа хаяж, амьдралаа алдаж байна гэх гомдол санал ихээр ирж байгаа.

Тэр утгаараа бид дотоодын спортын уралдаан тэмцээнүүдэд "bet" тавьдаг эрх зүйн орчинг энэ хуулиар оруулж ирэхээр зорьж байгаа гэдгийг хэлье. Үүнээс гадна сугалааны харилцааг зохицуулна" гэлээ.