"Pro" театрын залуус "Инээмтгий хүн" зохиолыг амилуулна

"Pro" театрын уран бүтээлч залуус 2014 онд ОХУ-н Санкт-Петербург хотын Театр урлагийн академийг найруулагч, жүжигчин мэргэжлээр төгссөн нэг ангийн уран бүтээлч залуучууд билээ. 

2022 онд эх орондоо эргэн ирж "Pro" театраа үүсгэн байгуулж уран бүтээлээ туурвиж эхэлсэн тэд өнгөрсөн оны арванхоёрдугаар сард “Гайхамшигт хүүхэлдэй” шоу тоглолтоо хүүхэд багачууддаа зориулан тогложээ.

Тэд Францын алдарт зохиолч Виктор Хюгогийн туурвисан бүтээлүүдийн ноён оргил болох “Инээмтгий хүн” романыг тайзны бүтээл болгон ирэх гуравдугаар сарын 4-ий өдрөөс эхлэн үзэгчдийн хүртээл болгох гэж байна. 

“Инээмтгий хүн” магадгүй хамгийн эмгэнэлт зохиол бас хамгийн аугаа хайрын тухай өгүүлэх зохиол гэлтэй. Жүжгийн үйл явдал XVII-XVIII зууны зааг үеийн Англид өрнөнө. Энэ зохиолд Лорд Линней Кленчарлийн азгүй хайр дурлал, золгүй хувь тавиланг зүрх шимширмээр өгүүлсэн байдаг. Тэрээр юу ч мэдэхгүй нялх багадаа муу хүмүүсийн гарт орж үзэшгүй муухайгаар зэрэмдэглүүлэх ба Гуинплен хэмээх нэр зүүж хэрмэл жүжигчин болдог.

Гуинплений бага байхдаа олж амийг нь аварсан сохор охин Дея өсөж том болоод бие биедээ хайртай болдог. Үзэшгүй муухай зэрэмдэг Гуинплен, хосгүй гоо үзэсгэлэнтэй боловч сохор бүсгүй Дея нар бие биедээ яг таарч тохирсон хос болдог. Хожим нь Гуинплен ховор аз завшаанаар өөрийн өндөр байр сууринд хүрэх боловч энэ нь түүнд сайн юм авчирдаггүй нь харамсалтай...

Тус жүжгийн ерөнхий продюсерээр СТА жүжигчин, найруулагч О.Итгэл, ерөнхий найруулагчаар Б.Даваасүрэн, Хөгжмийн зохиолчоор ОХУ-ын хөгжмийн зохиолч Дахалэ.С.Ж, ерөнхий зураачаар Б. Анхбаатар нар ажиллажээ. 

Дүрүүдэд:

Девид – З. Булган

Баркельфедро – О. Итгэл /СТА/

Анна – О. Минжинсор

Жозианна – Э. Буд-Эрдэнэ

Хомо – З. Булган

Урсус – Ц. Төмөрхуяг /МУГЖ/

Дея – Т. Энэрэл /СТА/

Гуинплен - Б. Билгүүн нар тогложээ.